Нийслэлийн хэмжээнд газар хөдлөлийг тооцоогүй барьсан нийтийн зориулалттай орон сууцны 300 гаруй барилга бий. Эдгээр барилгыг 1970-аад оноос өмнө барьсан гэж Нийслэлийн Барилга хот байгуулалт, төлөвлөлтийн газрын мэргэжилтнүүд Засаг даргын зөвлөлийн хурал дээр танилцуулав. Тус газар “Барилга байгууламжийн газар хөдлөлтөнд тэсвэрлэх чадварыг үнэлэх журам”-ыг зөвлөлийн хурлаар батлуулахаар оруулсан. Энэхүү журмыг батлуулах үндэслэлийн тухайд Монгол Улсын Засгийн газар 2009 оны 5 дугаар сарын 27-ны өдрийн 157 дугаар тогтоолоороо “Газар хөдлөлтийн гамшгийн эрсдлийг бууруулах үндэсний хөтөлбөр” баталжээ. Уг хөтөлбөрийг хэрэгжүүлэх үйл ажиллагааны төлөвлөгөөнд газар хөдлөлтийн аюулын үнэлгээ хийж, ерөнхий болон бичил мужлалын зураг зохиох, барилга байгууламжийг паспортжуулах, газар хөдлөлт бүртгэх станцын сүлжээг өргөтгөх ажлуудыг тусгаж өгсөн байна.

Ингээд “Барилга байгууламжийн газар хөдлөлтөнд тэсвэрлэх чадварыг үнэлэх журам”-ыг НИТХ-д өргөн барихаар боллоо. Улаанбаатар хотын тухайд хотын төвийн хэсэгт орон сууц, олон нийтийн зориулалтын нийт 24650 ш барилга байгууламж, түүнд 380200 мянган хүн ам оршин сууж байна. Баригдсан нийт барилгуудын нэлээд хэсэгт буюу 1970-аад оноос өмнө баригдсан барилга байгууламжид газар хөдлөлтийн арга хэмжээ авагдаагүй байдаг нь хүчтэй газар хөдлөлтийн үеийн эрсдлийн хэмжээ өсөхөд голлох нөлөөг үзүүлэх юм. Тиймээс барилга байгууламжийн газар хөдлөлтөнд тэсвэрлэх чадвараар үнэлэх журамтай болсноор учирч болзошгүй газар хөдлөлтийн гамшгаас урьдчилан сэргийлэх, ашиглагдаж байгаа барилга байгууламжийн хийц, бүтээцийг зориулалтыг өөрчлөх, хүчитгэх эсвэл буулгах замаар учирч болох хохирлыг багасгана. Түүнчлэн олон нийт, иргэн болон үйлдвэрийн барилга, зам гүүр, ус суваг, далан хаалт зэрэг байгууламж, инженерийн шугам сүлжээний аюулгүй байдлыг хангаж, байгалийн болзошгүй аюулаас урьдчилан сэргийлэх зорилгоор зориулалтын багаж тоног төхөөрөмжийн тусламжтайгаар барилга, байгууламжийн газар хөдлөлтөнд тэсвэрлэх чадварыг үнэлэн паспортжуулан, дүгнэлт гаргах юм. Ийнхүү барилга байгууламжийн газар хөдлөлтөнд тэсвэрлэх чадварыг үнэлэн паспортжуулан, дүгнэлт гаргаснаар тухайн барилга, байгууламжийг ашиглагч аюулгүй орчинд ажиллаж, амьдрахын зэрэгцээ газар хөдлөлийн аюулаас урьдчилан сэргийлэх ажил үе шаттайгаар хийгдэх учиртай.