Орон сууцны ажлын хэсгийнхэн Ерөнхий сайдын өрөөнд хуралдлаа. Өнгөрсөн баасан гаригт болсон хуралдаанаар иргэдэд олгож байгаа орон сууцны зээлийн хүүг зургаан хувь болгож бууруулах боломжийг судлаад тодорхой болгох үүргийг Ерөнхий сайд ажлын хэсгийнхэнд өгсөн юм.

Ажлын хэсгийнхэн орон сууцны зээлийн хүүг дээрх хэмжээнд бууруулах тооцоо үндэслэлийг Ерөнхий сайдад танилцуулсан байна. Гэвч тодорхой шийдвэр гараагүй бөгөөд маргааш болох Засгийн газрын ээлжит хуралдаанаар энэ тухай үргэлжлүүлэн хэлэлцэж холбогдох хуульд өөрчлөлт оруулах тухай ярихаар болжээ. Энэ талаар Х.Баттулга сайдаас тодруулав.

-Орон сууцны зээлийн хүүг бууруулах талаар ажлын хэсэг ямар чиглэл гаргасан бэ?
-Иргэдэд орон сууцны зээл өгөхөд хүү чухал. Зээлийн жилийн хүүг зургаан хувьд хүргэх чиглэлийг өмнө нь өгсөн. Монголбанк, арилжааны банкууд энэ талаар хувилбаруудаа яриад лхагва гаригт шийдье гэсэн тохиролцоонд хүрлээ.

-4000 айл орон сууц хөтөлбөрт зөвхөн төрийн албан хаагчид хамрагдсан. Хувийн хэвшлийнхнийг хамруулах боломжтой юу?
-140 мянган төрийн албан хаагч байдаг. Тэднээс орон сууцтай болохыг хүссэн нь 70-80 хувь бий. 4000 бол бага квот. Энэ квот дуусаагүй байна. Тодорхой орлоготой хүмүүс орон сууцанд орох ёстой.

-Зээлийн хүүг бууруулахын тулд зөрүүг нь төсөвт суулгана гэж ярьж байсан?
-Бусад орны туршлагыг харахад улсаас татаасаар дэмждэг. Найман хувь гэвэл хоёр хувийг татдаг гэх мэт. Ингэж явах ёстой.

-Хэдий хэмжээний мөнгө шаардлагатай байгаа бол?
-Орон сууцны хөтөлбөрөөс л шалтгаална. Том хөтөлбөрт их мөнгө хэрэгтэй.

-Хөтөлбөрийг хэзээ эхлүүлэх вэ?
-Энэ хавраас эхлүүлэхээр төлөвлөж байна.