Улаанбаатар хот 470000 га газар нутагтай. Үүнээс 27680 га барилгажсан талбайтай. Нийслэлийн хүн амын 41.5 хувь нь инженерийн бүрэн хангамжтай нийтийн зориулалттай орон сууцанд, 58.5 хувь нь үндэсний орон сууц гэр хороололд амьдардаг гэсэн судалгаа байдаг. Тэгвэл инженерийн бүрэн хангамжтай орон сууцны долдугаар хорооллыг байгуулах ажил эхлэх гэж байгаа энэ үед газраа чөлөөлсөн иргэдийг түр суурьшуулах орон сууцанд оруулах юм.

Энэ талаар нийслэлийн Хот байгуулалт, төлөвлөлтийн газрын Хот байгуулалтын хэлтсийн Сүхбаатар дүүрэг хариуцсан архитектор Ч.Рэгзмаагаас тодруулсан юм.

-Орон сууцны VII хорооллын газрыг чөлөөлж, тэнд байгаа иргэдийг түр суурьшуулах орон сууцанд оруулна. Тэгвэл газраа чөлөөлсөн иргэд хэзээ байрандаа орох вэ?
-Орон сууцны VII хорооллын хэсэгчилсэн ерөнхий төлөвл өгөө нь СБД-ийн 9, 10, 11,12-р хороог хамарсан 210 га талбайд төлөвлөлт хийгдэж 2008 онд батлагдсан. Энэ жилээс Нийслэлийн Засаг дарга бөгөөд Улаанбаатар хотын захирагч Г.Мөнхбаяр санаачлан нийслэлд шинээр баригдах VII хорооллын авто зам болон инженерийн шугам сүлжээний хамгаалалтын бүсэд байрлаж буй 854 нэгж талбарыг нөхөн олговортойгоор чөлөөлөхөд 20 тэрбум төгрөг зарцуулах шийдвэр гаргаад байгаа. Үүний дагуу ажил хийгдээд явна. Түр оршин суух байрны хувьд одоогоор орох боломжгүй. Энэ байрыг барьж дууссаны дараа улсын комисс хүлээж аван түүний дараа хүн амьдрах боломж нь бүрдэх юм.

-Тэгэхээр газраа чөлөөлсөн иргэд орох оронгүй болох юм байна. Энэ байр хэзээ ашиглалтад орох юм?
-Өнгөрсөн жил барилгын суурийг тавьсан. Дулаараад барилгын ажил эхлэхээр барих юм. Нийслэлийн Засаг даргын захирамж өнгөрсөн жил гарсан. Захирамжийн дагуу барилга угсралтын ажлыг тендерт шалгарсан “Бэрэн констракшн” ХХК гүйцэтгэж байгаа. Гэрээний дагуу 2011 онд ашиглалтад оруулна.

-Энэ байрыг хаана барьж байгаа юм бэ?
-Газраа чөлөөлж өгсөн айл өрхийг түр суурьшуулах 300 айлын орон сууцны барилгыг Сүхбаатар дүүргийн 11-р хорооны нутаг дэвсгэрт барьж байна. Тодруулбал, Цагдаагийн гудамж, нийслэлийн Өмчийн харилцааны газрын аж ахуйн хашаанд барьж байгаа.

-Энэ байр хэдэн давхар, хэчнээн байр баригдах юм бол?
-300 айлын орон сууцны барилга нь нийт 14.2 мянган метр квадрат талбай бүхий зоорьтой 15-н давхар хос барилга байна. Өрөөнүүдийн хувьд 27-35.5 метр квадрат талбай бүхий нэг өрөө сууцнууд байх юм. Энэхүү орон сууц ашиглалтад орсноор гэр хорооллыг барилгажуулах, дахин төлөвлөлт хийхэд газраа чөлөөлсөн айл өрх, ашиглалтын шаардлага хангахгүй барилга байгууламжуудыг шинэчлэн барилгажуулахад чухал үүрэг гүйцэтгэх юм.

-Цаашид бүх дүүргүүдэд түр оршин суух байр баригдана гэсэн. Энэ талаар?
-Дүүрэг бүрт түр суурьшуулах түрээсийн орон сууц баригдана. Тухайлбал Чингэлтэй дүүрэгт 300, Баянголд 450, Сонгинохайрханд 150 айлын түрээсийн орон сууцны барилга баригдана.

-Тухайн иргэн газраа чөлөөлж энэ байранд орохын тулд хаана хандах вэ?
-Тухайн хөрөнгө оруулалт хийж байгаа компани, иргэн аж ахуйн нэгжийн хоорондын гэрээ мөн нийслэлээс гурвалсан гэрээ хийж орох байх.