Нийслэлийн Засаг даргын санаачилгаар Хөрөнгө оруулалтын газар, "Хас" банктай хамтран "Нийслэлийн хөрөнгө оруулалт-2011" мэдээллийн яармагийг өчигдөр Монголын хүүхдийн ордонд зохион байгууллаа. Уг арга хэмжээнд НИТХ-ын дарга Т.Билэгт, Нийслэлийн Засаг дарга бөгөөд Улаанбаатар хотын Захирагч Г.Мөнхбаяр болон албаны бусад хүмүүс оролцсон юм. Нийслэлийн төсвийг урьд онуудтай харьцуулбал гурав дахин нэмэгдээд буй өнөө үед хөрөнгө оруулалтын төсөл арга хэмжээг гүйцэтгэгч байгууллага, аж ахуйн нэгжүүдтэй харилцан дэлгэрэнгүй мэдээлэл солилцож буй нь цагаа олсон ажил юм. Нийслэлээс энэ онд улсад 26.7 тэрбум төгрөгийг төвлөрүүлнэ. Энэ хөрөнгийг бүрдүүлэх ажилд аж ахуйн нэгж, татвар төлөгчид зонхилох үүргийг гүйцэтгэхээр байгаа. Харин өнгөрсөн онд улсад 56.7 тэрбум, 2009 онд 62.7 тэрбум төгрөгийг төвлөрүүлж байсан аж.

Түүнчлэн нийслэлд энэ жил 79 тэрбум төгрөгийн хөрөнгө оруулалттай ажил хийгдэхээс 20 тэрбумыг зөвхөн долдугаар хорооллын айл өрхүүдэд газар чөлөөлөх чиглэлээр зарцуулна. Тухайн хорооллын нутаг дэвсгэр дээр байгаа нэг айлын газрыг дунджаар 40-50 сая төгрөгөөр үнэлэхээр төлөвлөжээ. Хамгийн гол нь нийслэлийн иргэд биднээс нэг л зүйлийг шаарддагийг та бүхэн мэдэж байгаа биз ээ. Тэр нь юу вэ гэвэл, олон нийтэд ойлгомжтой, үр дүнтэй, чанартай ажил хийхийг нийт нийслэлчүүдийн зүгээс тухайн ажлыг хариуцагчаас шаарддаг. Өөрөр хэлбэл татвар төлөгчдийн мөнгийг аваад гүйцэтгэл, үр дүн, чанар гэсэн зорилт тавин ажиллах юм.

Тиймээс чанаргүй ажилд хөрөнгө оруулалт хийхгүй гэсэн үг. Ажил аваад хариуцлагагүй ханддаг тийм байдлыг Улаанбаатар хот дэмжихгүй гэж НЗД Г.Мөнхбаяр хатуу анхааруулав. Мэдээллийн яармагийн үеэр төсөл гүйцэтгэгч аж ахуйн нэгж, байгууллагууд барилгын материалын чанар стандартын шаардлага хангасан материал, түүхий эдээ дэлгэн тавьж сурталчилсан юм. Мөн нийслэлээс баримталж буй хөрөнгө оруулалтын бодлого чиглэл, төр, хувийн хэвшлийн түншлэл, хөрөнгө оруулалтын төсөл зэргийг хэрхэн зохион байгуулах тухай мэдээлэл, зөвлөгөөг мэргэжлийн байгууллагын зүгээс өгөв.