Улаанбаатар хотод газар хөдөлж байшин нурж мэргэжлийн байгууллагуудыг түргэн авахуулав. Нийслэлийн хамгийн өвгөн барилгын нэг, 70-аад жилийн өмнө баригдсан, Бөхийн өргөөний хажууд орших 40-р байр газар хөдлөлтийн үеэр хамгийн түрүүнд нурж гал авалцахад тэндэхийн оршин суугчдаас тухайн цагт гэртээ байсан 57 хүнийг аврахын тулд мэргэжлийн байгууллагууд чадах бүхнээ хийсэн юм. Аврах ажиллагаа 40 минутын турш үргэлжилж 80 хувийн амжилттайгаар өндөрлөлөө.

Сүүлийн үед Улаанбаатар хотод газар хөдөлж болзошгүй тухай мэдээлэл олон нийтийн дунд түгээд байгаатай холбогдуулан мэргэжлийн байгууллагуудын бэлэн байдлыг шалгах зорилгоор Нийслэлийн онцгой байдлын газраас үзүүлэх сургууль зохион байгуулсан нь энэ байлаа. Нэгэнт нуралт үүсээд эхэлсэн 70 настай дээрх барилгад оршин суугчид нь амьдрахаа болиод удаж байгаа юм байна. Тиймээс үзүүлэх сургуулийг зохион байгуулагчид нь хотын төвийн эл газрыг гамшгийн төв обьектоо болгон сонгожээ. Газар хөдлөлтийн гамшиг тохиолдсон үед онцгой байдлын анги салбарууд, эмнэлэг, улаан загалмай, эрчим хүч, ус суваг, цэрэг цагдаагийн байгууллагуудын харилцан ажиллагаа ямар түвшинд байх ёстойг мэдрүүлэх, мөн тухайн албадын бэлэн байдлыг хангах зорилготой тус үзүүлэх сургуулийн үр дүнг Улаанбаатар хотын захирагч ийнхүү дүгнэж байна.

Гурван үе шаттай явагдсан энэхүү арга хэмжээнд дээрх мэргэжлийн байгууллагуудаас нийт 300 гаруй хүн оролцож авран хамгаалах мэдлэг туршилгаа солилцлоо. Оролцогсдоос Шуурхай бүлэг-105, түргэн тусламж, гал түмэртэй тэмцэх ангийн ажилтнууд дадлага туршилгаараа илт ялгарч байсан нь байнгын бэлтгэл сургуультай байдаг албаных нь онцлогтой холбоотой юм.

Хүн ам шигүү суурьшсан нийслэл хотод маань олон нийтийг хамарсан гэнэтийн осол гамшиг тохиолдох үед мэргэжлийн байгууллагуудын авран хамгаалах ажиллагаа сайн байна хэмээн нийслэлийн удирдлагууд дүгнэлээ.

Монцамэ