Олны ярьж сурснаар хуучин Тээврийн товчооноос төмөр зам давуулан Хан-Уул дүүргийн Цагаан хаалганы чиглэлд 895 метр урт, 19,5 метр өргөн, хоёр талдаа тус бүр 1,5 метрийн өргөн явган хүний зам бүхий гүүрэн байгууламжийн барилгын ажлыг эхлүүлэх ёслол боллоо. Япон Улсын буцалтгүй тусламжийн хүрээнд хийж гүйцэтгэх уг төслийн нээлтэд НИТХ-ын дарга Т.Билэгт, Нийслэлийн Засаг дарга бөгөөд Улаанбаатар хотын Захирагч Г.Мөнхбаяр, ЗТБХБ-ын сайд Х.Баттулга, Япон Улсаас Монгол Улсад суугаа Онц бөгөөд бүрэн эрхт Элчин сайд Т.Кидокоро, Японы олон улсын хамтын ажиллагааны байгууллагын суурин төлөөлөгч Ю.Ишида нар оролцсон юм.

 

Төмөр замыг давуулан нийслэлийн өмнөд хэсгийг төв хийгээд хойд хэсэгтэй холбох уг байгууламжийг “Нарны гүүр” хэмээн нэрлэх бөгөөд ашиглалтад орсоноор Энхтайваны болон Гурвалжингийн гүүрний ачаалал эрс багасч, замын түгжрэл буурна гэдгийг мэргэжлийн хүмүүс хэлж байгаа. Одоо хийгээд байгаа судалгаагаар уг гүүр ашиглалтад орсны дараа өдөрт 30-аас 50 мянган машин явж өнгөрөх гэнэ. Таван тулгуур, зургаан алслалтай гүүрэн байгууламжийг ажлын төлөвлөгөөний дагуу 2012 онд ашиглалтад өгөх юм.

 

 

Нээлтэд оролцсон хотын дарга Г.Мөнхбаяр “Япон Улсын буцалтгүй тусламж, дэмжлэгээр Улаанбаатар хотод бүтээн байгуулалтын болон бусад олон ажил хийгдэж байна. Тухайлбал, Нарны замын бүтээн байгуулалтын ажлыг дуусгаж ашиглалтанд оруулсан, Хуурай хог хаягдал боловсруулах төсөл Нарангийн энгэрт хэрэгжиж байгаа” гээд япон мэргэжилтнүүд манай улсад ирж хамтран ажилласнаар монголын инженер техникийн ажилчдын мэдлэг чадвар ч гэсэн тодорхой хэмжээгээр дээшилнэ. Шинээр барих гүүр нь хөдөлгөөний дөрвөн эгнээ бүхий хоёр урсгалтай, хүнд даацын машин явах боломжтой, 30-аас 55 метрийн алгасал бүхий металл дам нуруутай байх ба нэг чухал ач холбогдол нь барилгын ажлын явцад манай зам гүүрийн барилгачдад шинэ техник, технологи шилжүүлж өгөх юм гэдгийг онцолсон. Мөн ноён Т.Кидокоро “Өнөөдөр ийнхүү нээлтээ хийж, шав тавьж байгаа “Нарны гүүр”-ийн барилгын ажил нь Монгол Улсын эдийн засаг, дэд бүтцийн хөгжилд эерэгээр нөлөөлөөд зогсохгүй, Япон, Монгол хоёр орны харилцааг улам бүр гүнзгийрүүлэхэд ихээхэн хувь нэмэр болох юм. “Нарны гүүр” төслийн ажил дууссанаар Улаанбаатар хотын автозамын түгжрэл тодорхой хэмжээгээр саарч, ачаа тээвэрлэлт нэмэгдэнэ гэдэгт итгэж байна” гэлээ.

 

Зуун жил ашиглах боломжтой уг гүүрэн гарцын захиалагчаар ЗТБХБЯ, хэрэгжүүлэгч нь НЗДТГ, Нийслэлийн Захирагчийн ажлын алба, Японы олон улсын хамтын ажиллагааны “ЖАЙКА” байгууллага, зөвлөхөөр Японы “СиТи АЙ” компани, гүйцэтгэгчээр “Жэй Эф И” компани оролцож байгаа юм. Гэрээнд заасны дагуу барилгын материал, тоног төхөөрөмж, ажиллах хүн хүчээ аль нэг гуравдагч улсаас авахгүй байхаар талууд тохиролцсон гэлээ.

 

Цаашид нийслэлд өрнүүлэх бүтээн байгуулалтын ажлуудын хүрээнд “Нарны гүүр”-ээс ач холбогдол хийгээд хэмжээгээр багагүй таван ч гүүрэн байгууламж барихаар яригдаж байна.

 

 

Улаанбаатар