Барилгын удирдах ажилтны зөвлөгөөн боллоо

Barilga
2019-11-05

Барилгын удирдах ажилтны зөвлөгөөн боллоо

Барилгын салбарын хөгжил улс орны хөгжлийг тодорхойлдог гол хүчин зүйлийн нэг байдаг. Тэр ч утгаараа манай улсын хувьд сүүлийн хэдэн жилд уналтанд орсон барилгын салбараа сэргээх зорилготой “Барилгын удирдах ажилтны 2010 оны зөвлөгөөн” болж өнгөрлөө. Уг зөвлөгөөнд Ерөнхий сайд С.Батболд, ЗТБХБ-ын сайд Х.Баттулга болон салбарын бүх түвшний удирдлагуудын 450 гаруй төлөөлөл оролцов. “Барилгын салбарын тулгамдсан асуудал, шийдвэрлэх арга замууд” нэрийн дор барилгын чанар, материал үйлдвэрлэл, үнэ гээд болохгүйг нь шүүмжилж, болж байгааг нь сайшаан хэлэлцсэн.

Барилгын материалын 70 гаруй хувийг импортын бүтээгдэхүүнээр хангадаг байдлыг багасгаж үндэсний үйлдвэрлэлийг хөгжүүлэх талаар цогц арга хэмжээ авах хэрэгтэй байгаа. Үүнд барилгын гол нэрийн бүтээгдэхүүн цемент, арматурын үйлдвэрийг эхний ээлжинд онцлон авч үзсэн.

Газар хөдлөлтийн идэвхитэй бүсэд оршдог нийслэлийн хувьд барилгын чанар хамгийн гол шалгууруудыг нэг болоод байна. Иймээс барилгын үнийг буулгахдаа гол нь биш чанартай барих нь чухал болоод байгааг ч мөн дурдаж байсан.

Барилгын салбарыг эдийн засгийн эргэлтэнд оруулах, иргэдээ байраар хангахын тулд ашигт малтмалын орд газруудын мөнгөн дүнгийн дөнгөж хоёр хувийг ашиглаж 100000 айлын орон сууц хөтөлбөрийг эхлүүлэхээр төлөвлөж байгаа аж.

Мөн энэ зөвлөгөөнөөр барилгын ажилчдын нийгмийн асуудал шийдэгдэхгүй орхигдож байна, тэдэндээ зориулсан ордон ч алга. Зөвлөгөөн зориод алсаас ирж байгаа барилгачидаа буулгах нэрийн зочид буудал ч байхгүй байна хэмээн ахмадын төлөөлөл үнэнийг өчиж байсан юм.

Тус зөвлөгөөний үеэр ЗТБХБ-ын сайд Х.Баттулгаас зарим зүйл тодруулснаа хүргэе.

- Барилгын салбарын бараа материал үйлдвэрлэлийг дэмжих ажлын хүрээнд эхний ээлжинд ямар ажлууд хийгдэхээр төлөвлөгдсөн вэ?

- Барилгын гол нэрийн бүтээгдэхүүн болох цемент, арматурын эх үйлдвэрлэлийг дэмжихээр төлөвлөн сонгоод ажилдаа ороод байна. Арматурын хувьд Дарханы Дэрэн компани шинээр үйлдвэрлэж эхэлж байгаа. Бид анхны бүтээгдэхүүнтэй очиж танилцаад ирсэн байгаа. Мөн Хөтөлийн цементийн үйлдвэрийн шинэтгэлийг 50 орчим тэрбум төгрөгөөр хийхээр төлөвлөж байна. Ингэснээр гол нэрийн бүтээгдэхүүн цемент, арматурын үнийг тогтмол байлгасанаар барилгын үнийг барих боломж бүрдэж байгаа. Түүнчлэн барилгын салбарын үнэ хөөрөгдлийг бууруулах юм. Импортын бүтээгдэхүүний хувьд гол нэрийн бус бүтээгдэхүүнийг бид хорихгүйгээр шийдвэрлэсэн байгаа. Хаалга, тааз, обой гэх мэт жижиг бүтээгдэхүүнүүдийг эх орондоо аяндаа үйлдвэрлээд эхлэх учраас хэрэглэгчид чанартайг нь сонгох боломж өөрт нь үлдэж байгаа юм.

- Импортоор орж ирэх бүтээгдэхүүнийг татварын бодлогоор зохицуулах талаар ямар ажил төлөвлөгдөөд байгаа вэ?

- Дотооддоо 100% үйлдвэрлээд хангах боломжтой болсны дараа импортын бүтээгдэхүүний тухай ярихгүй бол үнийн өсөлт үүсэх магадлал маш өндөр болоод байгаа юм. Тиймээс эхний ээлжинд дотоодын үйлдвэрлэлдээ анхаарлаа хандуулах хэрэгтэй байгаа юм.