Баянзүрх дүүргийн ЗДТГ-ын одоо үйл ажиллагаа явуулж буй барилга нь ашиглалтад ороод 60 жил болж байгаа бөгөөд мэргэжлийн хяналтын байгууллагын дүгнэлтээр ашиглах боломжгүй гэж тогтоогдоод байгаа юм. 1500 орчим ам.метр уг барилгад 1990 оноос хойш их засвар хийгээгүй бөгөөд өнөөдрийн байдлаар ямар нэгэн засвар авах боломжгүй болжээ. Тус дүүргийн удирдлага дотоод боломжоо ашиглан алба хэлтсүүдээ өөр газруудад байршуулж иргэдэд төрийн үйлчилгээг тасралтгүй үзүүлж байгаа аж.

 

Нэгэнт байдал ийм байгаа учир уг барилгыг нурааж оронд нь шинэ байшин барихаар зураг төсөл хийлгэсэнээ тус дүүргийн удирдлага танилцуулжээ. Шинээр босох барилга нь нийт 4000 орчим ам.метр талбайтай байх бөгөөд нийт өртөг нь 3.2 тэрбум төгрөг болж байгаа аж. Одоогийн байдлаар Баянзүрх дүүргийн удирдлага 600 орчим сая төгрөгийн эх үүсвэрийг өөрсдийн нөөц дээр тулгуурлан шийджээ. Дүүргийн энэ саналыг НИТХ-ын тэргүүлэгчид дэмжсэн байна.