Дорнод аймгийн Газрын харилцаа барилга хот байгуулалтын газар, Барилгачдын холбоо, ЗДТГ хамтран Барилгачдын зөвлөгөөнийг саяхан зохион байгуулжээ. Зөвлөгөөнд барилгын компаниудын төлөөлөл, захиалагч байгууллага, мэргэжлийн хүмүүсийн 70 гаруй төлөөлөгч оролцсон юм.

 

Зөвлөгөөнийг аймгийн ГХБХБГ-ын дарга Д.Дамдинбазар, аймгийн Засаг даргын орлогч Л.Хишигтогтох нар нээж, “Аймгийн дэд бүтэц, тулгамдсан асуудал, хэтийн зорилт” сэдвээр Хөгжлийн бодлогын хэлтсийн дарга Н.Дашням илтгэл тавилаа. 

 

Дорнод аймгийн нийт хүн амын 54 хувь нь Чойбалсан хотод амьдардаг. Хүн амын тоо төв, газрын суурьшлыг бусад аймгуудтай харьцуулахад илүү нь харагддаг. Энэ хэрээр барилгын бүтээн байгуулалт өрнөж, гурван жилийн өмнө аймгийн дотоодын нийт бүтээгдэхүүн 61,7 тэрбум байсан бол, жилийн дараа 80 тэрбум болж өсчээ.   Өнөөдрийн байдлаар тус аймагт барилга угсралт, зураг төсөл гаргадаг тусгай зөвшөөрөлтэй 25 аж ахуйн нэгж байгууллага үйл ажиллагаагаа явуулдгийн 5-8 нь тендерт оролцдог байна. 2008 онд аймгийн хэмжээний барилгын салбарт 2,9 тэрбум төгрөгийн хөрөнгө оруулалт хийсэн бол 2009 онд 1,2 тэрбум төгрөгийн хөрөнгө оруулж өнгөрсөн оныхоосо 2,4 хувиар багассан нь улс орныг хамарсан эдийн засгийн хүндрэлтэй холбон үзэв. Тус аймгийн хэмжээнд энэ жил улсын болон аймгийн төсвөөс 2 тэрбум төгрөгийн 25 төрлийн барилга угсралтын ажил хийгдэх юм. Одоогийн байдлаар 17 төрлийн 1,1 тэрбум төгрөгийн ажлын тендер зарлагдаад байна. Тус зөвлөгөөн дээр тендерийн бичиг баримтын бүрдүүлэлтэд онцгой анхаарах шаардлагатай байгаа болон барилгын зураг төсвийн зохиолт чанарыг сайжруулах хэрэгтэйг онцлон дурдаж байлаа.  

 

Төлөөлөгчид “Тендерийн комис­сын гишүүдэд ямар хүмүүс байдаг вэ?, Байшингуудын дээвэр дээр барих мансард хэддүгээр байшин дээр баригдах юм?, Манай аймагт төмрийн үйлдвэрлэл явуулах нөхцөл бий юу?, Барилгын ажил улирлын онцлогтой. Зуны гурван сард ажиллаад есөн сар зүгээр суудаг. Энэ хугацааны ажилчдын нийгмийн даатгалыг төрөөс төлөх боломж бий юу?, Энэ жил мэргэжлийн сургалт үйлдвэрлэлийн сургуулийг хэдэн хүүхэд барилгын мэргэжлээр төгсөх вэ?” гэхчлэн асуулт тавьж хариулт авсан юм. 

“Тендерт бага үнийн саналаар шалгаруулдаг нь чанар муутай барилга босно гэсэн үг. Тендэрт ялсан компани ажлаа хийх мөнгөө авах гэхээр банкны барьцаа нэхдэг. Ажил гүйцэтгэх урьдчилгаа мөнгө өгөх тал дээр анхаараач ээ. Орон нутгийн компаниудыг тендерт оролцоход бодлогоор дэмждэг байх хэрэгтэй. Ханын материалын үнэнд хяналт тавих шаардлагатай байна. Зураг төсвийн товчоо байгуулах саналыг дэмжиж байна” зэрэг саналыг төлөөлөгчид хэлж байв. Уулзаагүй удсан барилгын салбарынхан тулгамдсан асуудлаа хэлэлцэн амжилт ололтоо ярилцан ийн зөвлөлдлөө. Зөвлөгөөний төгсгөлд барилгачид санал нэгтэйгээр уриалгаа батлав. Уг уриалгад барилгын ханын болон төмөр бетон, төмөрлөг хийцийн материалын үйлдвэрлэлийг бодлогоор дэмжин хөгжүүлэх, барилгын зураг төсвийн байгууллагыг бэхжүүлэх, цаашид зураг төсвийн товчоо болгон өргөтгөх ажлыг санаачлан зохион байгуулах, барилгын гүйцэтгэх компаниудыг мэргэжилтэй ажилчин, инженер техникийн ажилтнуудаар хангах, шинэ залуу боловсон хүчнээр багаа чадваржуулан бэхжүүлэх талаар дурджээ.

 

 

Монцамэ