Хотын төв хэсгийн 11 байршилд автомашины төлбөртэй зогсоол байгуулах шийдвэрийг НИТХ-аас гаргаад багагүй хугацаа өнгөрч байна. Нэг цагийн 200 төгрөгийн төлбөртэй уг зогсоол хаана, хэрхэн хийгдэх талаар нийслэлийн Барилга хот байгуулалт, төлөвлөлтийн газрын дарга Н.Нацагдоржоос тодрууллаа.

-Нийслэлийн зарим хэсэгт автомашины төлбөртэй зогсоол байгуулах талаар НИТХ-ын шийдвэр гарсан. Харин шийдвэр хэрэгжихгүй байна гэсэн шүүмжлэл гараад байгаа. Хэзээнээс энэ шийдвэр ажил хэрэг болох гэж байна вэ?

-Улаанбаатар хотод төлбөртэй зогсоолыг байгуулж, хөдөлгөөн, үйлчилгээний соёлыг бий болгох нь нэн тэргүүнд тавигдаж байгаа асуудал. Зөвхөн хүнээс төлбөр хураахын тулд үүнийг хийхгүй. Хүмүүсийн хамтран амьдарч буй орчинд аливаа зүйлийг бусдаас илүү хэрэглэж байгаа бол тэр хэмжээндээ тохирсон төлбөр төлдөг байх ёстой гэсэн зарчмыг бий болгох ёстой. Манай хотын машины даац маш их байгаа. Гэтэл машин тавьж, зогсох талбай нь хүрэлцдэггүй. Ер нь хүрэлцэхээр ч төлөвлөдөггүй. Тиймээс төлбөртэй зогсоолуудыг бий болгохоор журам боловсруулагдаж, нийслэлийн Иргэдийн төлөөлөгчдийн хурлаар батлагдсан. Ирэх тавдугаар сараас энэ ажил газар дээрээ хийгдэж эхэлнэ. Гэхдээ тавдугаар сард шууд гараад хүнээс мөнгө хураагаад эхлэхгүй. Эхний арван нэгэн байршилдаа төлбөр хураах орчин үеийн системийг нэвтрүүлнэ. Зураг төслийн ажлууд хийгдэж байна. Ирэх сараас газар дээр нь тэмдэг тэмдэглэгээ, хаалт хашлагыг хийж, Авто замын газар үйлчилгээг нь хариуцаж ажиллана.

-Төлбөрийн асуудал нэлээд яригдаж, цагийн зөрүүтэй төлбөр тогтоох санал ч гарч байсан. Яг эцсийн шийдвэр ямар байгаа вэ?

-Нэг цагийн хураамж нь 200 төгрөг байгаа. Төлбөрийн 200 төгрөгийг бага байна гэж хүмүүс шүүмжилсэн. Ашиг олохын төлөө, хүнийг мөнгө төлүүлж замын бөглөрөлийг шийдэх гэж буй асуудал биш. Тиймээс бид хүмүүсийн орлогод дарамт учруулахгүй байхыг илүүд үзсэн. Хэт өндөр төлбөрийг тогтоосноор төлбөр төлдөг нэг хэсэг, төлдөггүй нэг хэсэг гэсэн зааг гаргахгүй байх зарчмыг баримталсан. Манайхан нэг асуудлыг шийдвэрлэх гэж байна гээд төлбөр төлж, асуудлаа ухамсарладаг хүмүүст дарамт учруулдаг. Харин хайхрахгүй байгаа хүмүүст нь арга хэмжээ авдаггүй, хаячихдаг. Энэ нь нийгэмд бухимдал үүсгэдэг. Тиймээс бага хэмжээгээр бүх иргэд төлбөрөө төлдөг байх нь д чухал. Нэг төрийн албан хаагч ажлын найман цагт машинаа тавихад 1600 төгрөг төлнө. Үүнийг сараар бодоход тухайн хүний орлогод нөлөөлөх хэмжээний мөнгө гарна шүү дээ. 500, 1000, 1500, 5000 төгрөг гэсэн саналууд гарч байсан. Өндөр төлбөр тухайн ажлыг явахад чөдөр тушаа болно уу гэхээс дэмжлэг болж чадахгүй. Тусгай зориулалтын машин болон урьдчилан төлбөрөө хийсэн зогсоолууд нь тэмдгээрээ ангилагдана. Урьдчилсан байдлаар төлбөрөө өгөөд, удаан хугацаагаар машинаа зогсооно гэвэл харьцангуй хөнгөлөлттэй үнээр гэрээ байгуулах боломжтой.

-Төлбөр хураамжийн хөрөнгө юунд зарцуулагдах бол?

-Бидний тооцоогоор эхний 11 байршилд хураах төлбөр чамгүй хэмжээний мөнгө гарч байгаа. Энэ мөнгө цаашдаа Улаанбаатарын бүх зогсоолыг төлбөржүүлэхэд зарцуулагдана. Эндээс орлого олоод, боломжийн хуримтлалтай болбол нэгдсэн зогсоолуудыг бий болгоно. Бидний хийгээгүй зүйлийг хувийн хэвшлийнхэн хийж байгаа шүү дээ. Том хашаагаар хашчихаад зогсоол хийгээд мөнгө олж байгаа. Уг нь энэ улсын мэдэлд байж, нэгдсэн соёлтой үйлчилгээ байх ёстой. Бид шинэ зүйл хийж байгаа юм биш. Өмнө нь хийгдээд, хүмүүс ашиг орлого олоод байгаа ажлыг нэгдсэн зохион байгуулалттай болгож, иргэдийнхээ сэтгэл санаанд хүрсэн үйлчилгээг үзүүлэхийг зорьж байгаа юм.

-Эхний ээлжинд хийгдэх 11 байршлыг ямар нэг нөхцөл шаардлагаар сонгосон уу?

-Төвийн хэсгийн ачааллыг багасгахын тулд энэ 11 байршлыг сонгосон. Сүхбаатарын талбайн урд талын хэсэг, нийслэлийн төр захиргааны байруудыг тойрсон хэсэг, томоохон худалдааны төвүүд зэрэг хотын төв хэсгүүдийг сонгосон байгаа.

Улаанбаатар Таймс