Монголын Үндэсний Худалдаа Аж Үйлдвэрийн Танхимаас 2010 оныг “Ногоон эдийн засаг, ногоон бизнесийг дэмжих жил” болгон зарласан билээ.

 

Зөвхөн материаллаг баялагийг бүтээх зорилгоор геологийн урт удаан хугацаанд бүрэлдэн тогтсон ашигт малтмал, байгалийн нөөц баялгаа олзворлон ашиглах замаар хөгжилд хүрдэг арга зам нь дэлхийн тогтсон жишиг билээ. Гэхдээ энэ хандлага нь хөгжлийн утга учир болсон хүний ая тухтай эрүүл орчин, гоо сайхны тааламж, мэдрэмжийг сүйтгэн үгүй хийх үр дагаврыг байнга дагуулсаар ирсэн нь түүхэн өнгөрсөн үед ч эдүгээ ч илэрхий байна.

 

Өөрчлөгдөн буй дэлхий ертөнцөө бид хөгжлийн “гарц”-аар дэмжин илүү хурдан эргэлт буцалтгүй өөрчлөлтөд хүргэснээр эх дэлхий, хүн төрөлхтний мөхөх хурдыг тэтгэх үү, эсвэл байгаль орчиндоо ээлтэй үйлдвэрлэлийг дэмжин, хүн зоны амьдралын цаашдын урт удаан, тогтвортой хөгжлийг хангах уу гэдгийг шийдвэрлэх чухал үе ирээд байна.

 

Иймээс технократ сэтгэлгээтэй зохион бүтээгч, шинийг санаачлагч инженерүүдийнхээ ур ухаан, оюуны чадавхийг ашиглах нь Монгол улсын цаашдын хөгжилд нэн чухал ач холбогдолтой болж байна.

 

Иймд шинийг санаачлагч инженерүүд энэ сарын 26-ны өдөр эвлэлдэн хуралдаж, санаа бодлоо хуваалцаж Монгол улсын тогтвортой хөгжилд бага ч гэсэн хувь нэмрээ оруулахаар зорьж байгаа юм байна.