Манай улсад анхны салхин цахилгаан станцыг байгуулахаар болжээ. Учир “Ньюком” ХХК 2003 оноос эхлэн Монгол улсад салхин цахилгаан станц барих төслийг санаачлан улмаар Төв аймгийн Сэргэлэн сумын нутагт орших Салхит уулыг сонгон салхины нарийвчилсан судалгааг дөрвөн жил явуулсан байна. Мөн энэхүү судалгааны ажилд АНУ-ын нэр хүнд бүхий “GEC” компанитай хамтран ажилласан бөгөөд салхин парк байгуулах боломж бүрэн байна гэж үзсэн аж. Үүнтэй холбогдуулан манай улсын засгийн газраас 2005 онд “Сэргээгдэх эрчим хүчний үндэсний хөтөлбөр”-ийг боловсруулсан бол энэ онд сэргээгдэх эрчим хүчний хуулийг батлан гаргаж хөрөнгө оруулалтыг татах таатай орчин бүрдүүлээд байгаа юм.

Энэхүү салхин парк нь хүчин чадлын хувьд 50 мВт байх бөгөөд энэ нь дулааны 2-р цахилгаан станцтай дүйцэхүйц хэмжээний эрчим хүчийг төвийн эрчим хүчний сүлжээнд нийлүүлнэ гэсэн үг ажээ. Мөн уг салхин паркийг байгуулснаар нэг жилд 123 мян тн нүүрс, 1.18 сая тн цэвэр ус хэмнэхээс гадна агаарт цацагддаг хорт хийг 150 мян тонноор багасгах боломжийг олгох юм байна. Энэ нь байгаль орчинд ээлтэйгээр зогсохгүй байнгын өсөн нэмэгдэж буй эрчим хүчний хэрэгцээг хангах, ОХУ-аас импортоор худалдан авдаг цахилгаан энергийн 30 хувийг орлох зэрэг чухал ач холбогдолтой юм. Энэ станцын шав тавих ёслол энэ Пүрэв гарагт болно.