Эдийн засгийн байнгын хорооны хуралдаанаар өчигдөр “Утаагүй Улаанбаатар” хөтөлбөрийг хэлэлцэх эсэхийг шийдлээ. Байнгын хорооны хуралдаанд БОАЖ-ын сайд Л.Гансүх, ЗТБХБ-ын сайд Х.Баттулга болон Улаанбаатар хотын удирдлагууд оролцлоо.

 

“Утаагүй Улаанбаатар” төслийг Засгийн газрын гишүүд жил гаруйн хугацаанд боловсруулан УИХ- д оруулж байгаа юм. Энэ хөтөлбөр хэрэгжсэнээр Улаанбаатар хотын 35 байрлалд 75 мянган айлын орон сууц бий болж, II, V цахилгаан станцыг барих ажлыг мөн эхлүүлэх юм байна. “Утаагүй Улаанбаатар” хөтөлбөрийн хүрээнд гэр хорооллын оршин суугчдын газрыг орон сууцны урьдчилгаа төлбөрт тооцон, газар дээр нь орон сууц барих юм билээ. Хөтөлбөрийн хүрээнд 90 гаруй хот суурин, 5000 км авто зам тавигдах юм байна.

 

Гишүүдийн зүгээс энэ хөтөлбөрийг хэрэгжүүлэхийн тулд хувийн хэвшлийнхнийг татан оролцуулах хэрэгтэй гэж байлаа. УИХ-ын гишүүн Р.Буд орон сууц барихын зэрэгцээ авто зогсоол бий болгомоор байна гэсэн санал тавьж байв. Утаатай тэмцсэнээр Улаанбаатар сайхан болчихгүй, гэр хорооллыг орон сууцжуулж байхаар өөрсдийнх нь өмчийн газарт улсаас дэд бүтцийг нь хангаж өгөөд, халаалтын шугам тавиад өгчихвөл ямар вэ? гэсэн санал гишүүдийн зүгээс гарч байлаа. Дээр нь төвлөрлийг сааруулах зорилгоор орон нутагт байшин барих шаардлагатай юу. Тэнд ажлын байр байхгүй болохоор ямар ч сайхан байшин бариад нэмэргүй гэж байв. ЗТБХБ-ын сайд Х.Баттулга “Өнөөөдөр Улаанбаатар хотын гэр хорооллын зөвхөн 20 хувь дээр нь орон сууц барихаар төлөвлөгдсөн байгаа. Бид энэ хөтөлбөрийг хэрэгжүүлэхдээ ажилгүйдэл, ажлын байрыг давхар зохицуулахыг зорьж байгаа юм. Гэр хорооллын үлдсэн 80 хувь дээр оршин суугчид ногоон хөтөлбөр хэрэгжүүлэх, хаус барих нь чөлөөтэй. Улсаас инженерийн шугам сүлжээнийх нь асуудлыг шийдээд өгнө” гэж байлаа. Юутай ч гишүүд “Утаагүй Улаанбаатар” хөтөлбөр төслийг хэлэлцэх нь зүйтэй гэсэн юм.

 

Харин Байгаль орчин, хүнс, хөдөө аж ахуйн байнгын хорооны хуралдаанаар “Ус” үндэсний хөтөлбөр батлах тухай УИХ-ын тогтоолын төслийг хэлэлцэх эсэх асуудлыг хэлэлцлээ. Хуралдаанаар Сэлэнгэ аймагт алт олборлож буй “Бороо гоулд” ХХК-ийн үйл ажиллагаатай танилцсан Ажлын хэсгийн дүнтэй танилцах байсан боловч ажлын хэсгийн ахлагч гадаадад томилолттой байгаа тул уг асуудлыг хойшлуулсан юм. Монгол улс усны нөөц багавтар орны тоонд багтдаг. Байгаа багахан нөөц нь нутаг дэвсгэртээ жигд бус тархсан, хяналт, менежмент сул, эрх зүйн орчин нь төдийлөн боловсронгуй бус, ус хангамжийн түвшин доогуур, ариутгах татуурга, цэвэрлэх байгууламжийн хүртээмж, хүчин чадал дорой, боловсон хүчин, хүний нөөцийн хомсдолтой оронд тооцогддог байна. Монгол Улсын Засгийн газраас дээрх асуудлуудыг шийдвэрлэх зорилгоор шат дараалсан хөтөлбөр хэрэгжүүлж байгаа ч уг хөтөлбөрүүдийн зорилго, зорилт, үйл ажиллагааны төлөвлөгөө нь уялдаа холбоо муутай, нэгдсэн удирдлага зохицуулалтгүй, эрх зүй, зохион байгуулалт, хяналт сул байгаагаас төдийлөн үр дүнд хүрэхгүй байгаа ажээ. Иймд эдгээр хөтөлбөрүүдийн зорилт, хэрэгжүүлэх арга хэмжээ, хүлээж буй үр дүн, шалгуур үзүүлэлтийг дахин авч үзэж, улсын хэмжээний хөгжлийн хөтөлбөр болгон боловсруулах шаардлага тулгарч байгааг БОАЖ-ын сайд Л.Гансүх танилцууллаа.

 

 Байнгын хороодын гишүүд уг хөтөлбөр ихээхэн хэмжээний хөрөнгө шаардсан төсөл болохыг хэлж, хөтөлбөрийг эргэж харах, засч янзлах, сайжруулах шаардлагатай байгаад санал нэгдэж байлаа. Тухайлбал, усны нөөцөд хяналт тавьж зүй зохистой ашиглах зорилгоор уул уурхай ашигт малтмалын ордууд дээр усны байцаагч болон мэргэжлийн хүн ажиллуулах, усны бодлого олон яам, агентлагт хуваагдан тодорхой асуудлыг шийдэхэд хариуцах эзэнгүй болж байгааг цэгцэлж, усны бодлогын удирдлага, зохион байгуулалтыг нэг газарт төвлөрүүлэх , түүнчлэн усыг эдийн засгийн эргэлтэд оруулах асуудлыг анхаарч судлан хөтөлбөрт тусгах, судлаач, эрдэмтдийн үгийг сонсох хэрэгтэй байгааг гишүүд ажлын хэсгийнхэнд анхааруулсан.

 

Харин УИХ-ын гишүүн Д.Энхбат уг хөтөлбөрийг яаманд буцаах нь зүйтэй гэсэн байр суурьтай байлаа. Тэрбээр хөтөлбөрт гарах үр дүн, зорилтууд, нөөцийн асуудлыг хэрхэн тусгасан нь харагдахгүй байгааг хэлээд, усны ашиглалт, нөөцийн талаар нарийн комплекс хөтөлбөр хэрэгтэй гэсэн юм. УИХ-ын гишүүн Г.Баярсайхан усны бодлогод маш их ач холбогдол өгсөн үндэсний хөтөлбөр гаргах хэрэгтэй хэмээж хөтөлбөрийг сайжруулж оруулж ирэх нь зөв гэсэн бол Ц.Сэдванчиг гишүүн,

 

-Эхний ээлжинд усны бодлого хариуцсан эзэнтэй болмоор байна. Монголчууд дотор эрхтний өвчнөөр их нас барах болсон. Энэ нь голдуу уснаас болдог гэсэн судалгаа байгаа. Ядаж энэ асуудлыг шийдэх хэрэгтэй. Өнөөдөр хөдөө орон нутгийн иргэд шороотой цасны усаар хоол ундаа хийж байна. Иймд энэ асуудалд ихээхэн нухацтай хандаж, үр дүнтэй бодитой зүйл хийх хэрэгтэй гэсэн юм. Ямартай ч байнгын хороодын гишүүдийн дийлэнх нь уг хөтөлбөрийг хэлэлцэх нь зүйтэй хэмээн дэмжлээ.