Улаанбаатар төмөр зам (УБТЗ) хувь нийлүүлсэн нийгэмлэгийн хурал хэдэн ч удаа манай нийслэлд эхэлж, даргынхаа асуудлыг эцэслэж чадаагүй билээ. Оросууд өөрийнхөө хүнийг тавьчих гээд манайх мөн л монгол хүнээр УБТЗ-аа толгойлуулчих санаатай зүтгээд тэр гэсэн дүр төрх л олон нийтийн санаанд үлдсэн. Юу юугүй монгол хүн томилчиход хүрвэл даргын суудалд санаархах хүн, бүлэглэл өдгөөгийн УБТЗ-д олон байсан гэсэн тайлбар ч явдаг билээ. Ямартай ч манай үндэсний тээврийн гол ачааг үүрдэг тус салбарын дарга нь монгол хүн, даргаар томилогдох xүртлээ үүрэг гүйцэтгэгчийн алба хашиж байсан В.Отгондэмбэрэл боллоо.
УБТЗ-ын  ерөнхий    хувь нийлүүлэгчдийн ээлжит бус хурал өнгөрсөн 6-8-нд Москва хотноо болж өнгөрчээ. Хуралд хувь нийлүүлсэн НИЙГЭМЛЭГИЙН ерөнхий хорооны дарга, Сангийн дэд сайд Ч.Ганзориг, ерөнхий орооны гишүүн Зам тээвэр, аялал суулчлалын яамны газрын дарга Д.Наранпүрэв, Төмөр замын хэрэг эрхлэх газрын орлогч дарга Т.Батболд нар хүрэлцэн очжээ. ОХУ-ын талаас мөн ерөнхий хорооны гишүүд болох И.В.Ромашов, А.В.Лушников нар оролцсон байна. Ийнхүү ээлжит бус хурлаар УБТЗ-ын даргын асуудлыг голчлон хэлэлцэн шийдвэрлэсэн. Бас нийгэмлэгийн харьяанд байсан орон сууцуудыг хувьчлах асуудлыг эцэслэсэн. Тийнхуү төмөр замчдад байраа хувьчлан авах эрх олгосон байна.

В.ОТГОНДЭМБЭРЭЛИЙН ТУХАЙ
1981 онд нийслэлийн арван жилийн нэгдүгээр дунд сургууль төгссөн. Улмаар 1986 онд Москва хотын Төмөр замын дээд сургуулийг төмөр замын тээврийн удирдлагын инженер мэргэжлээр дүүргэсэн байна. 1992 онд Засгийн газрын хэрэгжүүлэгч агентлаг Удирдлагын академид удирдлагын аргазүйчээр суралцжээ. 1998 онд Бүх Оросын Гадаад худалдааны академийг олон улсын эдийн засагч мэргэжлээр төгссөн аж. 1986 оноос Замын-Үүд, Дархан, Улаанбаатар өртөөнд ачаа тээврийн агент, жижүүр, орлогч дарга, даргаар ажилласан нь тус салбарт ажиллаж хөдөлмөрлөсөн эхний үе гэж болно. 1994 оноос УБТЗ-ын төлөвлөгөө эдийн засгийн албаны дарга, замын санхүү эдийн засгийн асуудал эрхэлсэн орлогч даргаар ажилласан нь нэгдүгээр орлогч даргын албыг авах хүртэлх хугацаа. 2006 оноос УБТЗ-ын нэгдүгээр орлогч дарга, замын даргын үүрэг гүйцэтгэгчээр ажиллаж ирэв. Тэрбээр Нийслэлийн иргэдийн төлөөлөгчдийн хуралд Баянгол дүүргээс суудалтай.
В.Отгондэмбэрэл нь төмөр замын салбарт 21 дэх жилдээ ажиллаж байна хэмээн товч намтарт нь өгүүлсэн байна. Энэ хугацаанд хөдөлмөрөө үнэлүүлэн хөдөлмөрийн хүндэт медаль, Монгол Улс, ОХУ-ын хүндэт төмөр замчин тэмдгээр шагнагджээ.