Урт хугацааны зээлээр орон сууцтай болох боломж байгаа тухай аль эртнээс ярьж байлаа. Банкууд 15-20 сая төгрөгтэй хүнд л орон сууцны зээл өгдөг. Харин 40 мянган айлын орон сууц барих төрийн том баримт бичиг заавал барьцаа мөнгө өгөхгүйгээр орон байртай болгох боломжийг иргэддээ олгож байгаа юм. Барилгын яам сайн мэдээ дуулгаж наадмын маргаашаас эхлэн орон байртай болох хүсэлтэй иргэдээс анхны захиалгыг авч эхлэхээр болжээ.
40 мянган орон сууц хөтөлбөрт хамрагдах горьдлого тань талаар болохгүй ээ гэж Орон сууцны санхүүжилтын корпорацийнхан хэлж байна. Орон сууцны захиалгын журмаа баталж, наадмын дараа иргэдийн өргөдлийг албан ёсоор хүлээн авч эхлэх болсныг дуулгая. Хэрвээ та төрийн болон хувийн хэвшлийн байгууллагад алба хашдаг бол албан газартаа өргөдлөө өгөх нь ээ. Иргэд - хороо, хориндоо, харин хөдөө, орон нутгийнхан засаг даргынхаа тамгын газарт өргөдлөө өгч, энэ нь Орон сууцны санхүүжилтын корпорацид хүрнэ. Таны гаргасан өргөдлийг Санхүүжилтын корпораци мэдээллийн сандаа бүртгэн авч, орлогын байдлаар багцлан, дарааллын дагуу 40 мянган орон сууцнаас байр олгох учиртай гэнэ.
Тухайн гэр бүлийн нэг л гишүүн өргөдөл гаргах ёстой. Мөн МУ-ын иргэн байж, тухайн газартаа байнга оршин сууж, тогтмол орлого, ажилтай байх нь хөтөлбөрт хамрагдах үндсэн шаардлага болж байгаа.
Одоогийн байдлаар ОССК-д 11000 иргэний өргөдөл ирээд байгаа гэнэ. Тэдний дунд багтсан хөгжлийн бэрхшээлтэй 60 гаруй иргэнийг эхний ээлжинд хөтөлбөрт хамруулах бодлого барьж байгаагаа корпорацийнхан хэлж байсан.
Барилгын гүйцэтгэлийн тухайд, амжилттай хэрэгжиж байгаа гэнэ. 1 тэрбум 300 сая төгрөгийн гүйцэтгэлийн ажил хийгдсэн. Хөдөө, орон нутагт барих 4, 8 айлын орон сууц ашиглалтад орж эхэлсэн, 40 айлын орон сууцнуудыг ирэх 10 сар гэхэд хүлээлгэж өгч дуусах юм бна. Нийслэл хотын хувьд, 12-р сарын дундуур 40 мянган орон сууц хөтөлбөрийн үр дүн мэдрэгдэж, эхний барилгууд ашиглалтад орж эхлэх нь ээ.
Бага, дунд орлоготой иргэдэд очно гэдэг утгаараа орон сууцны үнийг зах зээлийн ханшаас доогуур байх бодлого барьж байгаа. Метр кв нь 350 ам доллараас өндөр байхгүй гэж хөрөнгө оруулалтын хэлтсийн дарга хэлж байлаа. Үнэ хямд болохоор, чанар муу гэсэн ойлголт иргэдийн дунд бий.
ОССК-иас банкуудад хамтран ажиллах санал тавьсны үндсэн дээр, одоогоор Улаанбаатар, Капитал банктай хамтран ажиллах болж, гэрээ байгуулж байгаа гэнэ. БХБ, Сангийн сайдын “40 мянган орон сууцыг бондын хөрөнгөөр барих тухай санхүүжүүлэх” журам гарч, батлагдсаны дагуу наадмын өмнө 939 сая төгрөгийг банкуудад байршуулах юм байна. Ингэснээр иргэдэд урт хугацааны, бага хүүтэй зээл олгогдож эхлэх нь ээ.
40 мянган орон сууц хөтөлбөрт гадна, дотны хөрөнгө оруулалтыг чиглүүлж байна. Гадаадын мэргэжилтнүүдтэй хамтран төсөл хөтөлбөрүүд хэрэгжүүлж байгаа юм байна. Мөн гадны барилгын технологи нэвтрүүлэхэд хөтөлбөрийн нэг зорилго чиглэж байгаа гэнэ.
Ямар ч байсан 40 мянган орон сууц хөтөлбөр үлгэрийн амлалт биш гэдгийг хэрэгжүүлэгч агентлагийнхан хэлж байна. Гагцхүү бодит ажил хэрэг болох цагийг олон түмэн хүлээж байна.