Монгол Улсын нийгэм, эдийн засгийн байдлын оны эхний таван сарын дүнг үндэсний статистикийн газар танилцуулжээ. Улсын нэгдсэн төсвийн нийт орлого тусламжийн дүн оны эхний таван сард 581.3 тэрбум төгрөг, нийт зарлага ба эргэж төлөгдөх цэвэр зээл 532.7 тэрбум төгрөг болж, нийт тэнцэл 48.6 тэрбум төгрөгний ашигтай гарчээ. Төсвийн урсгал орлого 578.8 тэрбум төгрөг, урсгал зардал 438.9 тэрбум төгрөг болж урсгал тэнцэл 139.9 тэрбум төгрөгийн ашигтай байна. Татварын нийт орлого өнгөрсөн оны мөн үеийнхээс 41.1 хувь, түүний дотор орлогын албан татвар 87.0 хувь, гадаад худалдааны татварын орлого 40.2 хувь, онцгой албан татвар 30.5 хувь тус тус нэмэгджээ.

Хэрэглээний бараа үйлчилгээний үнэ тариф тавдугаар сард суурь үетэй/2005 оны12 сар/харьцуулахад 10.8 хувь, өнгөрсөн оны мөн үеийнхээс 5,7 хувь, өмнөх оны жилийн эцсийнхээс 4.5 хувь, өмнөх сарынхаас 0.9 хувь тус тус өссөн байна. Хүнсний барааны бүлгийн дүн өмнөх сарынхаас 2.2 хувь өссөн нь тухайн сард ерөнхий индекс 0.9 хувь өсөхөд нөлөөлжээ. Энэ бүлгийн дүн өсөхөд махны үнэ, тухайлбал хонь үхрийн мах, хонины цувдайны үнэ өссөн нь нөлөөлжээ. Гадаад худалдааны бараа эргэлт энэ сард 14.2 сая ам.долларын алдагдалтай гарав. Сүүлийн гурван сар дараалан ашигтай гарсан энэ үзүүлэлт сөрөг гарахад импортын бүтцэд өндөр хувийн жин эзэлдэг эрдэс бүтээгдэхүүний импорт 52.0 сая ам. доллараар, машин, механик төхөөрөмж, цахилгаан хэрэгсэл, тэдгээрийн сэлбэг, эд ангийн импорт 39.7 сая ам.доллараар, хүнсний бэлэн бүтээгдэхүүний импорт 39.7 сая амь доллараар нэмэгдсэн зэрэг нь нөлөөлсөн байна.