Дэвшилтэт технологиор бүтээсэн зуух шалгаруулна
Barilga
2019-11-05
Нийслэлийн Иргэдийн Төлөөлөгчдийн Хурал, Нийслэлийн Засаг даргын Тамгын газар, Нийслэлийн Агаарын чанарын алба хамтран зуух үйлдвэрлэгч аж ахуйн нэгж, байгууллага, хувь хүмүүсийн дунд утаагүй зуухны уралдаан зарлаж байна. Улаанбаатар хотын агаарын бохирдлыг бууруулахад шаталт сайтай дэвшилтэт технологи бүхий зуух шаардлагатай байгаа. Сүхбаатарын талбайд энэ сарын 28-29-нд болох утаагүй зуух шалгаруулах арга хэмжээний үеэр мэргэжлийн байгууллагын дүгнэлттэй гэрийн цахилгаан халаалтын системүүдийг иргэдэд сурталчлах юм байна.
Зуух үйлдвэрлэгчид нь өөрсдийн зохион бүтээсэн зууханд түлшийг шатаан шүүгчдээр шаталтын эхэн үед ялгарах “утаа”-ны өтгөн шингэн байдал, үргэлжлэх хугацааг хэмжүүлж дүгнүүлж, эхний гурван байрт орсон зуухыг сонгон шалгаруулж дараагийн шатны хэмжилт хийх аж. Тесто-350ХL утааны хийн шинжлүүрийн багажаар тус бүр 1 цагийн хугацаагаар хэмжилт хийж шаталтаас ялгарах CO, NOx, SO2 зэрэг хийнүүдийн агууламжууд нь MNS 5457 : 2005 стандарт буюу “Халаалтын ба гэрийн зуухны яндангаар гарах утааны найрлага дах агаар бохирдуулагч бодисын (CO, SO2, NOx, үнс) хүлцэх дээд хэмжээ ба хэмжих арга” стандартын үзүүлэлтүүдийг хангаж буй эсэхийг тогтоож, дээрх үзүүлэлтүүдийг хангасан тохиолдолд, эсвэл агууламж нь хүлцэх дээд хэмжээнээс ялимгүй их байгаа тохиолдолд зуух-түлшний зохистой хувилбарыг сонгох туршилтын ажилд хэрэглэгдэх зуухны тоонд сонгон оруулах юм байна.
Улаанбаатар Таймс