Барилгын  даацийн гол хийц бүтээцийн зориулалттай арматур төмөр үйлдвэрлэдэг Хан Арт ХХК, Асралт дөл ХХК, Да Ен ХХК, Сюг ХХК, НКВ ХХК-ууд нь бүтээгдэхүүнээ чанарын баталгуужуулалтанд хамруулж тохирлын гэрчилгээ аваагүй атлаа арматур үйлдвэрлэж худалдан борлуулж байсан. УМХГ-аас дээрх аж ахуйн нэгжүүдэд илэрсэн зөрчил дутагдлуудыг арилгуулахаар үүрэг даалгавар өгч үйл ажиллагааг нь зогсоосон. Байгууллага, аж ахуйн нэгж иргэд дээрх ямар ч баталгаагүй үйлдвэрүүдээс   даацын хийцийн арматур төмрийг  авахгүй байх нь зүйтэй юм.

Мөн барилгын бетон болон төмөр бетон хийцийн үндсэн түүхий эд материал болох цементийг цементийн ченж нараас худалдан авч барилга угсралтанд хэрэглэхдээ шинжилгээ хийлгэдэггүй зөрчил гарсаар байгаа бөгөөд үүнээс болж их хэмжээний алдагдалд орох явдал ч гарч байна. Тухайлбал УНДЕГ-ын захиалгаар баригдаж байгаа барилгад цементийн ченжээс авсан цементийг /Хөтлийн ЦШҮ-т үйлдвэрлэгдсэн/ хэрэглэж бетон цутгасан,  уг цемент нь стандартын шаардлага хангахгүй байснаас бетоны бат бэх зураг төслийн шаардлага хангахгүй болж бетон хийцийг буцаан буулгаж дахин шинээр хийж гүйцэтгэсэн.  Иймээс их хэмжээний цементийг авч хэрэглэхдээ заавал дээж авч эрх бүхий лабораторид шинжлүүлсэний үндсэн дээр хэрэглэж байх хэрэгтэй.

Сүүлийн үе тоосгоны үйлдвэрүүдэд ч мөн чанарын шаардлага хангахгүй бүтээгдэхүүн үйлдвэрлэх явдал гарч байгаа нь шалгалтаар илэрч байна. Ийм тоосгоор барилга байгууламж барих явдал бас ажиглагдаж байна. Тухайлбал Эко констракшн ХХК-ий гүйцэтгэж буй Баянгол орон сууцны хорооллын барилгуудад стандарт чанарын шаардлага хангахгүй тоосго /Тан лон ХХК-ий тоосгоны үйлдвэрт үйлдвэрлэсэн/ хэрэглэж байгаа нь шалгалтаар илэрсэн.

Импортоор оруулж ирсэн зарим барилгын материалууд ч чанарын шаарлага хангахгүй байх явдал гарч байгаа бөгөөд үүний нэг жишээ нь хятадад үйлдвэрлэсэн дээврийн шифр юм. Уг шифрийг худалдан борлуулагч нар тухайн бүтээгдэхүүний чанарын сертификат, баталгаажуулалтын ямар ч баримт бичиггүйгээр хэрэглэгчдийг хууран мэхлэх замаар худалдан борлуулж байгаагаас иргэд хохирч байна. Уг шифрийг  байшингийн дээвэрт хэрэглээд 2 сарын дараа шифр үйрч бутарч унаж, дээврээс ус алдаж хохирсон явдал гарч байсан. Энэ тал дээр хил гаалийн байгууллага онцгой анхаарч чанарын шаардлага хангахгүй бараа материалыг хилээр оруулахгүй байх тал дээр анхаарч ажиллах шаардлагатай байна.

Иймээс байгууллага, ард иргэдэд сэрэмжлүүлэхэд аливаа барилгын материалыг худалдан авахдаа гарал үүслийн гэрчилгээ, чанарын паспорт, лабораторийн шинжилгээ, баталгааг нь шалгаж шаардлагатай тохиолдолд эрх бүхий лабораторид шинжилгээ туршилт хийлгэсний үндсэн дээр худалдан авч байх нь зүйтэй байна.