“Утаагүй Улаанбаатар” хөтөлбөрийг хэлэлцэж байгаа энэ үед Нийслэлийн Засаг дарга бөгөөд Улаанбаатар хотын захирагч Г.Мөнхбаяр, нийслэлд уг хөтөлбөрийг хэрэгжүүлэхэд голлон хариуцаж ажиллах ажлын хэсгийг байгуулж анхны хуралдаанаа хийж ажлын хэсгийн гишүүдээ томиллоо.

Нийслэлд “Утаагүй Улаанбаатар” хөтөлбөрийг хэрэгжүүлэх ажлын хэсгийг хотын дарга Г.Мөнхбаяр ахалж, орлогчоор Нийслэлийн Засаг даргын барилга, хот байгуулалтын асуудал хариуцсан орлогч Б.Мөнхбаатар ажиллана. Харин ажлын хэсгийн бүрэлдхүүнд Улаанбаатар хотын ерөнхий архитекторч бөгөөд Нийслэлийн барилга, хот байгуулалтын газрын дарга, Инженерийн байгууламжийн хэлтсийн дарга, Авто замын болон Ус сувгийн удирдах газрын дарга зэрэг албан тушаалтнууд багтаж байгаа юм.

“Утаагүй Улаанбаатар” хөтөлбөрийг хэрэгжүүлэхэд цахилгаан, зам, дулаан гээд дэд бүтцийн олон талын ажлууд хийгдэх зайлшгүй шаардлага бий. Гэхдээ эхлээд ямар ажлаас эхлэх вэ гэдэг нь юу юунаас чухал. Иймээс ажлын хэсгийнхэн нийслэлийн хэмжээнд аль асуудлаас эхэлж төслөө хэрэгжүүлэхээ тодорхойллоо. Гэр хорооллыг орон сууцжуулахад нэн шаардлагатай инженерийн шугам сүлжээ, усан хангамж гээд шийдвэрлэвэл зохих олон асуудал тулгараад буйг хуралд оролцогчид онцлоод ирэх долоо хоногт ажлын хэсэг дахин хуралдаж дулааны хангамжийн асуудлаар хэлэлцэхээр болсон юм.

Улаанбаатар Таймс