ШУА-ийн харьяа Үндэсний хөгжлийн хүрээлэнгийн эрдэмтэд газарзүйн мэдээллийн нэгдсэн цогц системийг хотын хөгжлийн удирдлагад нэвтрүүлэх саналаа өнөөдөр хотынхонд танилцууллаа. Тэд Эрхүүгийн Эрдэм шинжилгээний төвийн боловсруулсан газарзүйн мэдээллийн системийг судлаад Улаанбаатар хотноо хэрэгжүүлэх боломжтой гэж үзжээ. Эрхүүгийн эрдэмтдийн хийсэн систем нь хотын зохион байгуулалт, зам, аж ахуйн нэгжүүдээс авахуулаад нийт хичнээн хэмжээний тээвэрлэлт хийсэн, байршлууд нь хэр оновчтой байгаа гээд бүгдийг нь судалжээ.

 

Орчин үеийн хот төлөвлөлт, хотын хөгжлийн бодлого, түүний хэрэгжилт газарзүйн мэдээллийн систем дээр суурилж байгаачлан Улаанбаатар хот газар зохион байгуулалт, барилга, хот төлөвлөлт, байгаль орчны салбарын бодлого төлөвлөлтөндөө газарзүйн мэдээллийн системийг үр дүнтэй ашиглаж байгаа. Гэвч цаашид хотын нийгэм, эдийн засаг, дэд бүтэц, экологийн нэгдсэн мэдээллийг газарзүйн ялгавартай байдлаар боловсруулан ашиглах нь аливаа бодлого, зорилтуудыг богино хугацаанд, үр ашигтай хэрэгжүүлэхэд чухал ач холболдолтой учир газарзүйн мэдээллийн цогц систем шаардлагатай байгаа юм.

 

Сүүлийн жилүүдэд нийслэлийн удирдлагууд Улаанбаатар хотыг хөгжүүлэх, тулгамдсан асуудлыг оновчтойгоор шийдвэрлэхийн тулд шинжлэх ухааны үндэслэлтэй бодлого шийдвэрүүдийг хэрэгжүүлэхээр ажиллаж байгаа. Өнгөрсөн онд Улаанбаатар хот үүсч байгуулагдсаны 370 жилийн ойг тохиолдуулан зохион байгуулсан “Нийслэлийн хөгжил- шинжлэх ухаан технологи” сэдэвт эрдэм шинжилгээний бага хурлаар олон эрдэмтэн, судлаачдын бүтээлүүдийг нэг дор судалж, хотын асуудлуудыг тал бүрээс нь хэлэлцсэн, энэ онд ШУА-тай хамтран ажиллах гэрэ байгуулж, олон ажил хэрэгжүүлэхээр төлөвлөсөн зэргээр шинжлэх ухааны ололт амжилтыг хотын хөгжилд ашиглах талаар багагүй ажил зохиож байгаа. Гэсэн хэдий ч салбар, чиглэл бүрээр суурь судалгаатай байх, өнөөгийн болон ирээдүйн чиг хандлагыг тодорхойлох, дүн шинжилгээ хийх, оновчтой бодлогын зорилт дэвшүүлэн хэрэгжүүлж байх цогц менежмент дутагдалтай байгаа юм. Тухайлбал, хотод хэрэгжиж буй хөтөлбөрүүдийн уялдааг хангах, хэрэгжилтийн үе шат бүрийн зорилтуудад хяналт, шинжилгээ хийж, үр дүнд нь үнэлгээ өгөх, үүнийхээ үндсэн дээр санхүүжилтийг тодорхой төлөвлөх шаардлагатай байдаг бөгөөд нэгдсэн системтэй болсноор дүүрэг, хороо тус бүр дээр бодлогын зорилтууд тодорхой болж, аль түвшиндээ тухайн бодлого, шийдвэр дутагдаж байгааг илрүүлэх, авах арга хэмжээгээ тухайн газарт чиглүүлэхэд чухал үүрэг гүйцэтгэх юм.