Хотын удирдлагыг дүүргүүдэд ажиллах үеэр СӨХ-ийн үйл ажиллагаатай холбоотой гомдол иргэдийн зүгээс их ирсэн байна.

 

Ашиглалтын хугацаа нь дууссан цахилгаан шатыг солих, ус гоожсон дээврээ засуулах гээд СӨХ-д хаягласан гомдол тасрахгүй байгаа учир Нийслэлийн Засаг дарга СӨХ-дын Дээд зөвлөл/СӨХДЗ/-ийнхнөөс энэ талаар хийж хэрэгжүүлэх ажлынх нь талаар мэдээлэл сонсов. Тус зөвлөлөөс өөрийн гишүүн болон гишүүн бус СӨХ-д шалгалт хийснээс 72-той нь холбоотой 17,8 сая төгрөгийн зөрчил илрүүлжээ. Шалгалтаар гишүүн СӨХ-ийн 61 хувь нь хангалттай үнэлгээ авсан бол, гишүүн бусийн дийлэнхийнх нь үйл ажиллагаа хангалтгүй гарчээ. Хотын дарга СӨХДЗ-өөс шаардлага тавихаар бид гишүүн биш гээд авч хэлэлцдэггүй, иргэд гомдол гаргахаар иргэддээ олддоггүй СӨХ-дын асуудлыг мухарлах, цаана нь олон хүний амьдрал байгаа учир гишүүн бус гээд орхилгүй энэ асуудлыг цэгцлэхийг үүрэг болгожээ.

 

Мөн дүүргийн удирдлагад хандаж, СӨХ-д тавих хяналтыг чангатгаж, иргэдэд үзүүлэх үйлчилгээнд нь эргэлт гаргаж ажиллахыг онцгойлон анхааруулав. Мэргэжлийн хяналтын Ерөнхий газраас нийтийн эзэмшлийн орон сууцны 240 цахилгаан шатыг зогсоох шаардлага тавьж, түрүүчээс нь зогсоосон бөгөөд СӨХДЗ-ийнхний мэдээлснээр энэ онд 35 цахилгаан шатыг солих, 80 барилгын дээвэрт их засвар хийх аж.