Нийслэлийн замуудад хийх зам засварын томоохон ажлууд эхэлж, хотын замын хөдөлгөөн ачаалал ихтэй байгаа билээ.

 

Бямба гаригийн шөнө хотын дарга хаагдсан замуудаар явж, зам засварын ажлын явцтай танилцан, зарим асуудлыг газар дээр нь шийдвэрлэж, үүрэг даалгавар өглөө. Баянбүрдээс 100 айл хүртэлх Их тойруугийн 1,54 км зам засварын ажил өнгөрсөн онд цаг агаар эрт хүйтэрсэнтэй холбогдон технологийн горим баримтлах үүднээс өнгөн хучилтыг хийлгүй зогссон. өнгөрсөн жилийн дутуу хийсэн ажлаа гүйцээхээр гүйцэтгэгч компани зам засварын ажилдаа орсон агаад амралтын өдрүүдэд замыг хэсэгчлэн хааж, хучилтыг хийн, 6 сарын 15 гэхэд ашиглалтад оруулах юм. Мөн энэ замын гэрэлтүүлэг, явган хүний зам засварын ажлыг бүрэн хийж гүйцэтгэнэ.

 

Одоогоор тус замд хоёр газарт таслалт хийжээ. Нэг нь 3-р сургуулийн өмнө гэрлэн дохио суурилуулахтай холбогдуулан тасалсан бол нөгөө нь өнгөрсөн онд тус замын борооны ус зайлуулах шугамын ажлыг хийж гүйцэтгэсэн “Наран тойрог” компанийн буруугаас болж, замын доорх ус зайлуулах шугам хагарсан тул үүнийг солихоор нэг хэсэг газар тасалжээ. Хотын дарга дахин ийм байдал гаргахгүйгээр ажлаа гүйцэтгэхийг бутуутай компанийнханд хатуу анхааруулаад, зөвхөн энэ гэлтгүй бүхий л хийгдэж буй ажлууд дээр зураг зохиогчийн хяналтыг чанд баримталж ажиллахыг холбогдох албаны хүмүүст үүрэг болгосон юм.

 

Харин “Тотал инж” компанийн гүйцэтгэж буй Эрхүүгийн гудамжны 0,7 км замыг хатуу хучилттай болгох ажлын явц сайн байна. Замын бүх хашлагыг сольж, хатуу хучилттай болгох энэ ажлыг гэрээгээрээ бол 6 дугаар сарын нэгэн гэхэд хүлээлгэн өгөх байсан ч бэлтгэлээ сайн базааж, ажлаа зохион байгуулсны үрээр ирэх нэг дэх гэхэд ашиглалтад оруулахаар ажиллаж буйгаа тус компанийнхан хотын даргад илтгэж байлаа. Харин “төлөвлөсөн хугацааныхаа наана ашиглалтад оруулж байгаа нь сайн хэрэг боловч хамгийн гол нь чанарын асуудал. Хотын түүх бичилцэж байгаа та бүхний хувьд цаасан дээр баталгаа гаргах бус хийсэн ажил чинь амьдрал дээр чанартай байх ёстой” гэдгийг хотын удирдлага онцлон анхааруулсан. Мөн асфальт нийлүүлэгч компаниуд үнээ нэмсэн асуудлыг судалж, асфальт нийлүүлэлтэнд тавих хяналтыг сайжруулахыг мэргэжлийн хяналтынханд үүрэг болгосон юм.

 

Хөрс хуулах шинэ техник оруулж ирэн өдөр шөнөгүй ажиллаж байгаа “Хотын зам” компанийн гүйцэтгэж буй Энхтайвны өргөн чөлөөний зам засварын ажил урагштай байна. Тус компанийнхан Баруун 4 замаас 10 дугаар хороолол хүртэлх 1,6 км замын хуучин хучилтыг хуулж, иж бүрэн шинэчлэх юм. Мөн 16 метрийн өргөнтэй байсан энэ замыг 21 метр болгож өргөсгөнө. Одоогоор Төмөр замын коллежоос баруун тийш 25 дугаар эмийн сан хүртэлх замыг хааж, замын хашлагыг солих, замын шороог тэгшилж нягтаршуулах ажлыг хийж байна. Харин тус замын зурваст орсон хэсэгт Гранд плазагийнхан машины зогсоол барьсан нь асуудал үүсгээд байгаа бөгөөд үүнийг шийдвэрлэж, замын ажлыг зургийн дагуу гүйцэтгэхийг хотын мэр даалгалаа. Одоогийн засварлаж буй энэ хэсгийн замын хөдөлгөөнийг 21-нд нээх бөгөөд энэ чиглэлийн зам засварын ажил 8 дугаар сарын 25 гэхэд бүрэн дуусах юм.

 

“Улаанбаатар зам засвар, арчлалт”, “Ялгуусан”, “Усны барилга, байгууламж” гэсэн гурван компанийн гүйцэтгэж буй Саппорогийн их тойруугийн зам засварын ажилтай хотын мэрийг танилцах үеэр замын хашлагыг сольж, борооны ус зайлуулах шугамын ажлыг гүйцэтгээд дуусч байлаа. Тэд асфальтан хучилтаа хийгээд ирэх даваа гаригийн шөнө гэхэд нээх төлөвлөгөөтэй байгаагаа танилцуулсан. Ийнхүү хотод өрнөөд буй зам засварын байдалтай газар дээр нь танилцаж, учирч буй хүндрэл бэрхшээл, шийдвэрлэх асуудлууд байгаа эсэхийг асууж лавлан явахдаа хотын дарга аливаа компаниуд тендерт шалгарах нь эхний алхам боловч, гүйцэтгэж байгаа ажлын чанар хамгийн гол асуудал гэдгийг онцлон хэлж байлаа. өнөө жилээс эхлэн хотын зүгээс тендерт шалгарч авсан ажлаа чанаргүй хийсэн, хугацаандаа гүйцэтгээгүй бол дараагийн тендерт оруулахгүйн зэрэгцээ олон нийтэд энэ талаар нь мэдээлэх арга хэмжээ авах юм.

 

 

Улаанбаатар Таймс