Нийслэлийн Засаг дарга Г.Мөнхбаяр шатахуун түгээх станц болон авто засвар үйлчилгээний зориулалтаар газар олгохыг зогсоохыг дүүргүүдийн удирдлагад үүрэг болголоо.

 

Үүнтэй уялдан барилга байгууламжийг ашиглалтад оруулах улсын комисс ашиглалтад хүлээж аваагүй газрын тосны бүтээгдэхүүн, шингэрүүлсэн шат­даг хийн агуулах, шатахуун түгээх, хий цэнэглэх станц, хий борлуулах цэгийн үйл ажиллагаа зогсоож, улсын комисст хүлээлгэн өгсний дараа үйл ажиллагаа явуулах арга хэмжээ авахыг нийслэлийн мэргэжлийн байгууллагуудад үүрэг болгосон байна.

 

Энэ оны 9 дүгээр сарын 1-ний дотор багтаан ил байрлалтай шатахуун хадгалах сав бүхий ШТС-уудыг далд савтай болгож технологийн шинэчлэлт хийж, аюулгүйн арга хэмжээг бүрэн хангах, шатахуун нөөцлөх, хий хадгалах саванд мэргэжлийн байгууллагаар металл хийцийн оношлогоо хийлгэж, савны битүүмжлэл, бат бөх байдал, ачаалал даах чадвар, ашиглалтын хугацаа тогтоолгохыг даалгалаа. Мөн газрын тосны бүтээгдэхүүн, шингэрүүлсэн шатдаг хийн хангамж, худалдааны чиглэлийн аж ахуйн нэгжүүд шингэрүүлсэн шатдаг хийтэй сав тээвэрлэж байгаа авто тээврийн хэрэгслүүдийг аюулгүй ажиллагааны шаардлага хангасан хэрэгслээр тонгоглох, хэрэглэгчдийг магадлалтад орсон хийн баллоноор хангах, цэнэглэх станц, борлуулах цэгүүдийг тусгайлан бэлтгэгдсэн харуул хамгаалалттай болгох зэрэг арга хэмжээ авах хэрэгтэй болж байна. Хүнсний болон хүнсний бус барааны худалдааны төв, цэг, салбаруудад бага оврын хийн зуухны савласан хий худалдаалах, хадгалах бүх ажиллагаа, барилгын зоорийн давхарт шингэрүүлсэн шатдаг хий худалдаж, хадгалахыг бүрэн зогсоож байгаа ажээ.

 

Мөн даралтат сав ашигладаг газрууд техникийн бүрэн бүтэн байдал, ашиглалтын үеийн аюулгүй ажиллагааг хангаж ажиллах, улсын бүртгэлд хамруулж, ашиглах зөвшөөрөл авах, авто засварын болон гагнуурын чиглэлээр үйл ажиллагаа эрхэлдэг газрууд хүрээлэн байгаа орчин, иргэдэд сөрөг нөлөө үзүүлэхгүй, галын болон аюулгүй ажиллагааны шаардлагыг бүрэн хангах, ажлын байрны шаардлага хангасан хүмүүсийг ажиллуулах, сургалтад хамруулж, мэргэжлийн үнэмлэхтэй болгохыг даалгажээ.