Барилгын үйлдвэрлэл дэх дэвшилтэт техник технологийн бага хурал амжилттай болж өнгөрлөө
Barilga
2019-11-05
Барилгын салбарын боловсон хүчний чадавхийг сайжруулах, шинэ дэвшилтэт технологи, бүтээгдэхүүнийг үйлвэрлэлд нэвтрүүлэхийг дэмжих зорилгоор барилгын салбарын оюутан, инженер техникийн ажилтнуудын дунд “Barilga high technology” онол практикийн бага хурлыг Барилгын зөвлөгөө мэдээллийн төв, ШУТИС, Барилгын коллежтэй хамтран зохион байгуулж, амжилттай болж өндөрлөлөө.
Оюутан залуус, инженер техникийн ажилчид өөрсдийн бүтээл, дэвшүүлэх санаа, шинэ техник технологийг сурталчилан барилгын салбарын ирээдүйн хөгжлийг тодорхойлж байгаа нь энэ бага хурлаас ажиглагдсан юм. Барилгын үйлдвэрлэл дэх дэвшилтэт техник технологийн бага хурал нь анх удаа зохион байгуулагдаж байгаа бөгөөд жил бүр уламжлал болгон явуулах нь илүү үр дүнтэй байх болно. Хуралд оролцогсод, үзэгчид, шүүгч нар зохион байгуулалт сайтай гэж дүгнэсэн ч дараа дараагийн илтгэлүүдийг шалгуур өндөр, өмнө нь тавигдаж байгаагүй шинэ бүтээл оролцуулахыг хүссэн юм.
Уг бага хуралд нийт 16 илтгэл тавигдсанаас:
1 -р байранд – “Дулааны хэмнэлттэй цонх” илтгэлээрээ “Цонх” констракшнийн захирал Л. Гантөмөр
2 -р байранд – “Хөнгөн дүүргэгч бетон” илтгэлээрээ “Арга билэг” ХХК инженер Т. Амарбат
3 -р байранд – “Металл биш арматурын механик шинж чанарын судалгаа” илтгэлээрээ ШУТИС-ын оюутан А. Нямсүрэн
Тусгай байранд ШУТИС-ын оюутан Пүрэвбат, Барилгын коллежийн оюутан Ө. Банзрагч, Усны эрчим ХХК-ын ажилтан Д. Өлзийсайхан нар орлоо.
Барилгын үйлдвэрлэл дэх дэвшилтэт техник технологийн бага хурлын ерөнхий зохион байгуулагч Барилгын зөвлөгөө мэдээллийн төв, ерөнхий ивээн тэтгэгчээр “NAB” групп ажилласан нь ирээдүйн боловсон хүчин, барилгын салбарт оруулж байгаа том хөрөнгө оруулалт билээ.
Барилгын коллежийн багш, барилга архитектурын тэнхимийн эрхлэгч Ж. Сарантуяагаас тус хурлын тухай тодрууллаа:
Үйлдвэрлэлийн салбарт ажиллаж байгаа инженерүүд болон энэ чиглэлээр суралцаж байгаа оюутнуудын дунд уг эрдэм шинжилгээ, онол практикийн бага хурлыг анх удаа зохион байгууллаа. Энэ удаагийн хурлын гол онцлог нь үйлдвэрлэлийн салбарт ажиллаж байгаа инженерүүдийг татан оролцуулсан явдал юм. Олон сайн илтгэлүүд ирлээ. ШУТИС, Барилгын коллеж, Үйлдвэр ААН-д ажиллаж буй инженерүүд харьцангуй сайн гүйцэтгэлтэй байна. Сонирхол татсан илтгэл их байлаа. Тухайлбал “Цонх” ХХК-ын захирал Амарбатын “Дулаан хэмнэлттэй цонх”, Барилгын инженерийн сургуулийн оюутан Нямсүрэнгийн “Металл биш арматурын механик шинж чанарын судалгаа”, Барилгын коллежийн оюутан Пүрэвбатын “Цутгамал төмөр бетон болон метал шон суурь цутгамал” илтгэлээ гурвалжингийн шинэ гүүрэнд хийсэн судалгаа гэх мэт. Мөн үйлдвэрлэлийн шинэ технологийн илтгэл их байсан. Оюутнууд маань ч ер нь идэвхитэй оролцлоо. Цаашид энэ эрдэм шинжилгээ, онол практикийн бага хурлыг байнга зохиож байх нь зүйтэй санагдлаа.
Барилга.МН
Т.Ундрал