Баянгол дүүрэг дэх аж ахуйн нэгж, байгууллага, СӨХ-ны ашиглаж буй 428 цахилгаан шатыг шалгахад илэрсэн зөрчлийг ирэх сарын нэгэн хүртэл арилгахгүй бол цахилгаан шатыг зогсоож, буруутай этгээдэд хариуцлага тооцно.

 

Учир нь 25-аас дээш жил ашиглаж, хугацаа нь дууссан 280 цахилгаан шатыг ашигласаар байна. СӨХ, мэргэжлийн байгууллагууд хууль, дүрмийг мөрдөөгүйгээс иргэдийн амь нас, эрүүл мэндэд нөлөөлөх ноцтой байдал үүсгэхэд бэлэн байгаа юм. МХЕГ, ОХУ-ын Красноярск хотын инженерийн зөвлөх төв, МСӨЭАХ “Нийтийн аж ахуйн хөгжил” сан хамтран хийсэн шалгалтаар техникийн паспорт, бичиг баримт зөвшөөрөлгүй 232 цахилгаан шатыг нийтийн үйлчилгээнд ашигладаг, сар бүр урсгал засвар, жил бүр шалгадаг техникийн ээлжит магадлалыг хийдэггүй, засвар үйлчилгээг угсарсан компаниар хийлгэдэггүй, аюулгүй ажиллагааг хариуцсан мэргэжлийн үнэмлэхтэй лифтчингүй, нэгдүгээр давхрын зогсоолын гадна хананд цахилгаан шатны даац, хурд, магадлалд орох хугацаа, мэргэжлийн байгууллагатай харьцах утас, аюулгүй ашиглах товч зааврыг байрлуулаагүй дутагдал илэрчээ.

 

Мөн эсрэг ачаа, бүхээгийн хаалгыг тохируулаагүй, ган татлага, дамрын ховил элэгдсэн, бүхээг болон давхрын хаалганы холбоо, ослын үед ажиллах баригчийн систем ажиллагаагүй, жижүүрийн өрөө хоорондын дуут дохиогүй байжээ.

 

 

Монцамэ