УИХ-ын Төсвийн байнгын хорооны хурлаар хандивлагч орон, олон улсын санхүүгийн байгуул­лагаас авсан зээлийг дамжуулан зээлдүүлсэн зээлийн буцаан тө­лөлт болон улсын төсвөөс эргэн тө­лөгдөх нөхцөлтэй олгосон зээ­лийн барагдуулалтын байдалтай танилцаж санал боловсруулах үүрэг бүхий Ажлын хэсгийн мэдээлэлтэй танилцав. Гэвч уг асуудлыг дахин ярилцаж, оруулж ирэх горимын санал гарч, гишүүдийн дэмжлэгийг авсан юм.

 

Сангийн яамны холбогдох албаны хүмүүс гишүүдийн асуултад хариуллаа. Х.Баделхан гишүүн “Засгийн газрын дамжуулан зээл­дүүл­сэн бүх зээлийн хугацаа хэтэр­чээ. Хуулийн байгууллагаар ший­дэгдсэн өр хэд байна вэ” гэсэн асуулт тавихад Сангийн яамны Өрийн удирдлагын хэлтсийн дарга Д.Ангар “Банкны өр барагдуулах албанд 2007 онд 200 тэрбум төгрөгийн хугацаа хэтэрсэн авлагыг шилжүүлсэн. Нэг жилийн хугацаанд 1.5 тэрбум төгрөг буцаан төлүүлж чадсан байгаа. Харин 2008 онд Засгийн газрын бүтэц, бүрэлдэхүүнд өөрчлөлт орж өр барагдуулах асуудал Хууль зүй, дотоод хэргийн яаманд шилжсэн. Сангийн яамны бүтцэд одоо өр барагдуулах чиглэлээр орон тоо байхгүй” гэсэн юм. Түүнчлэн Д.Дамба-Очир гишүүний “Гадаад зээ­лийг 2009, 2010 онд дамжуулан зээлдүүлсэн үү. Хугацаа хэтэрсэн зээлтэй аж ахуйн нэгжүүдийг шүүхэд өгч хариуцлага тооцож болдоггүй юм уу” гэсэн асуултад Д.Ангар “2009 онд 32 тэрбум төгрөгийг дамжуулан зээлдүүлсэн. Сүүлд олгогдсон зээл бол баталгаатай. Гэрээ хэлцэл хий­гээд хяналт тавьж байна. Харин 1990-ээд оны дунд үед олгогдсон зээ­лүүдэд гэрээ ч байхгүй, авсан эзэн нь ч тодорхойгүй байдаг. Нөгөө­тэйгүүр, байлаа гэхэд буцаан авч болдоггүй. Эрчим хүчний бай­гууллагуудаас 550 тэрбум төг­рөгийн авлагаа авах гэхээр “Төр эрчим хүч­ний үнийг барьчихсан. Бид нэмж болдоггүй. Хэрэв өрөө төлөх юм бол дампуурах гээд байна” гэдэг. Ийм зүйлийг төрийн бодлогоор зохицуулах шаардлагатай. Тэгээд бас хугацаа хэтэрсэн зээлийг Хууль зүй, дотоод хэргийн яаманд өгөх гэхээр шүүхийн шийдвэргүй гээд хүлээж авдаггүй” гэж хариулав.

 

Ц.Батбаяр гишүүн дампуурсан банкуудын талаар мэдээлэл өгөхийг хүссэн юм. Тэрбээр, гадаадаас ав­сан зээлийг “Зоос”, “Анод” зэрэг дам­пуурсан банкинд Засгийн газар дамжуулан зээлдүүлчихсэн байна. Тиймээс энэ асуудлыг яах вэ, шүүхэд өгөөд шийдүүлж болдоггүй юм уу гэж тодруулсан юм. Гишүүний энэ асуултад Сангийн яамны төрийн нарийн бичгийн дарга Д.Баттөр “Шүүхээр шийдүүлье гэхээр бидэнд ямар ч нотлох баримт байдаггүй. Гэрээ хэлцэл хийлгүй зүгээр л зээл олгоод байсан юм билээ. Төлөгдөөгүй байгаа энэ авлага ерөнхийдөө мэдээлэл бүрхэг зээлүүд юм” гэв. Мөн гишүүн О.Чулуунбат, Ч.Улаан нар өр барагдуулах механизмыг сайжруулах талаар саналаа хэлж байв. Тухайлбал, хугацаа хэтэрсэн зээлийг гаднын өр барагдуулах чиглэлээр туршлагажсан аж ахуйн нэгжүүдэд худалдах хэрэгтэйг хэлж байв. Өөрөөр хэлбэл, нэг тэрбум төгрөгийн өрийг барагдуулж чадвал 10-20 хувиар нь урамшуулж байх механизм бий болгох ёстой гэж байлаа. Түүнчлэн О.Чулуунбат гишүүн “Засгийн газар зээлийг гэрээгүй танил тал, найз нөхдөдөө өгснөөс болж ийм зүйл үүдсэн. Тэгэхээр дамжуулан зээлдүүлэх зээлийг цаашид Засгийн газар өөрөө биш банкаар дамжуулбал асуудалгүй” гэсэн санал гаргаж байлаа.