Улаанбаатарчуудын амралт, чөлөөт цагаа өнгөрүүлэх орчин үеийн соёл амралтын хүрээлэнгийн нэг болгохоор зорьж буй Үндэсний цэцэрлэгт хүрээлэнд хөрөнгө оруулах сонирхолтой гадныхны түрүүч төслөө танилцуулж эхэллээ. Өнгөрсөн онд шаваа тавьсан, Олимпийн гудамжаас зүүн тийш Баянзүрхийн гүүр хүртлэх 650 га талбай эзэлсэн энэхүү цэцэрлэгт хүрээлэнд Улаанбаатар хоттой харилцаа хамтын ажиллагаатай хотууд өөр өөрсдийн онцлог бүхий тохижилтын ажил хийх юм.

Орчин үеийн шийдэл бүхий цогцолбор босгох хөрөнгө оруулалтын төсөл бэлтгэж ирснээ БНХАУ-ын Бээжин хотын Хот тохижилтын албаны төлөөлөгчид өнөөдөр хотын удирдлагуудад танилцуулсан байна.

Бээжин хоттой ах дүү хотуудын найрамдалт харилцаагаа хөгжүүлэх, тэдэнд үүх түүхээ сурталчилсан, өөрийн орны онцлог бүхий цогцолбор байгуулахад нь зориулж Үндэсний цэцэрлэгт хүрээлэнд 70 га газарт хөрөнгө оруулах гэрээнд өнгөрсөн онд гарын үсэг зурсан юм. Өмнөд хөршийн нийслэлийн төлөөлөгчид усан парк, спортын талбай болон хиймэл нуур, нарсан төгөл, халуун орны ургамал бүхий иж бүрэн “Сити парк” байгуулах төсөл боловсруулжээ.
 

Улаанбаатар