Өчигдөрийн байдлаар нийслэлийн 100 айл болон Гурвалжингийн гүүрний орчим дахь барилгын материал худалдах бөөний захууд дээр өмнө нь 4200 - 4800 төгрөг байсан 50 кг - аар савласан цемент  7- 8  мянган төгрөг, шингэн  цемент буух  төмөр замын ачих, буулгах 44 дүгээр цэг дээр өмнө нь 80-90 мянган төгрөг байсан нэг тонн цемент 120-140 мянган төгрөг хүрээд байлаа. Тэр ч байтугай үнэ нь өссөнөөс тэр үү гэлтэй цементийг кг-аар нь савлан 300 төгрөгөөр зарж байлаа. Хөтөлийн цемент, шохойн үйлдвэр их засвар хийж, технологио сайжруулан үйлдвэрлэлээ өргөтгөж байгаагаас болоод цементийн зах зээл ийнхүү "хямралд" оров. Дарханы цементийн үйлдвэр, дээр нь урд хөршөөс манай стандартыг хангасан, хангаагүй цемент их хэмжээгээр орж ирж байгаа. Олон үйлдвэр, олон ханган нийлүүлэгч байсаар байхад ингэж байгаа нь барилгын материалын тэр дундаа цементийн зах зээл дээр монопольт байдал задраагүйг нэг талаар харуулж байна. Нөгөө талаар хүн бүр толгой хорогдох байртай болох гээд, улсаас 40000 айлын орон сууц хөтөлбөрийг зарлаж бүтээн байгуулалт эхлүүлэхийг хичээж байгаатай холбоотойгоор барилгажилт өрнөж, түүний түүхий эдийн нэг цементийн эрэлт хэрэгцээ нэмэгдсээр байгааг үгүйсгэхгүй.