Одоогоос нэг жилийн өмнө “Хангарьд ордон”-ы 13 давхарт байрлах “Хот байгуулалтын үзэсгэлэн” нээлтээ хийж байсан. Нийслэлийн 371 жилийн ойн өдөр буюу үзэсгэлэнгийнхээ нэг насны төрсөн өдрийг угтаж НБХБТГ-ын Хот байгуулалтын хэлтэс макет болон самбаруудаа шинэчлэн сайжруулж баяжуулах ажлыг хийж гүйцэтгэж байна.

Монгол Улсын Их Хурлын 2010 оны 36 дугаар тогтоолоор батлагдсан “Шинэ бүтээн байгуулалт” дунд хугацааны зорилтот хөтөлбөрийг олон нийтэд сурталчлан танилцуулах зорилгоор тус хөтөлбөрийн хүрээнд хэрэгжих хэсэгчилсэн ерөнхий төлөвлөгөөг шинээр хийж байршуулсан. Улаанбаатар хотын төвийн хэсгийн макетыг 1:1000 масштабаар хийж гүйцэтгэх ажлыг эхлүүлж Бага тойруу доторх болон Багатойруугийн авто зам дагуух макетыг хийж гүйцэтгээд байна.

Цаашид уг ажил үргэлжлэн хийгдэж баруунаас зүүн тийш орон сууцны 1 дүгээр хорооллоос Амгалан хүртэл, хойноос урагш 32-ын тойрог орчмын газраас Туул гол хүртэлх газар нутгийг хамарсан макет хийгдэх юм. Нийслэл хотод тулгамдаад байгаа асуудлуудад ямар арга хэмжээ авч бодлого боловсруулж байгаа болон шинэ хорооллуудын онцлог, хэрэгжилтийн явцын талаар мөн хотынхоо одоо ирээдүйн төлөвлөлттэй танилцахыг хүссэн хэн бүхэнд “Хот байгуулалтын үзэсгэлэн” нээлттэй ажилладаг. Үзэсгэлэнг ажлын өдрүүдэд 9-17 цагийн хооронд үзэж сонирхох боломжтой.