Засгийн газрын уржигдар болсон хуралдаанаар “Улаанбаатар хотыг 2020 он хүртэл хөгжүүлэх ерөнхий төлөвлөгөө”-г тодотгох шийдвэрийг гаргасан байна. Нийслэлийн Засаг даргын Барилга, хот байгуулалтын зөвлөх Э.Хүрэлбаатартай энэ асуудлаар уулзаж ярилцсан юм.

 

 

-Улаанбаатар хотын ерөнхий төлөвлөгөөг зайлшгүй тодотгох хэрэгтэй болсон. Тийм ч учраас “Улаанбаатар хотыг 2020 он хүртэл хөгжүүлэх ерөнхий төлөвлөгөө”-нд тодотгол хийх шийдвэрийг Засгийн газраас гаргалаа. Тодотголыг 2030 он хүртэл хийхээр болж байна. 2010 онд багтаан ерөнхий төлөвлөгөөг шинэчлэх ажлыг хийнэ. 2011 онд “Улаанбаатар хотыг 2030 он хүртэл хөгжүүлэх ерөнхий төлөвлөгөө”-ний төсөөллийг Засгийн газрын хуралдаанд, дараа нь Улсын их хурлаар хэлэлцүүлж, батлуулах юм. Засгийн газрын тогтоолоор Улаанбаатар хотын ерөнхий төлөвлөгөөг тодотгох ажлын хэсгийг хүртэл байгуулсан. Ажлын хэсгийн ахлагчаар нь Зам тээвэр, барилга хот байгуулалтын дэд сайд Т.Пүрэвдорж ажиллана. Харин дэд даргаар нь нийслэлийн Засаг даргын орлогч Б.Мөнхбаатар ажиллахаар болсон.

 

 

-Улаанбаатар хотын ерөнхий төлөвлөгөөнд тодотгол хийх судалгааг гурван жилийн өмнөөс “Жайка” олон улсын байгууллага эхлүүлсэн юм. Уг судалгаан дээр үндэслэн “Улаанбаатар хотыг 2030 он хүртэл хөгжүүлэх ерөнхий төлөвлөгөө”-г боловсруулна. Ингэхдээ монгол мэргэжилтнүүд ерөнхий төлөвлөгөөний тодотголыг хийнэ.

-Энэ ажлыг хэрэгжүүлэх ажлын хэсэг гарсан байна. Харин хөрөнгө мөнгө нь шийдэгдэв үү?

-Хөрөнгийн эх үүсвэрийг Засгийн газраас нийт 900 сая төгрөгөөр баталж өгсөн. 2010 онд Сангийн яамнаас 300 сая төгрөгийг гаргахаар шийдвэрлэлээ. Хөрөнгө мөнгө нь шийдэгдсэн болохоор энэ ажил эхлэхэд бэлэн гэж хэлж болно.

 

 

-Зөвхөн зам, гүүрийн салбарт нийт 74 тэрбум гаруй төгрөгийн ажил хийгдэхээр боллоо. Эдгээр ажлууд нь эргэн төлөгдөх нөхцөлтэйгээр санхүүжилт нь хийгдэх юм. Өнөөдөр /өчигдөр/ л гэхэд Улсын их хурлаар Нарантуул олон улсын худалдааны төвийн баруун талын төмөр зам дээгүүр гүүрэн байгууламж байгуулах 22 тэрбум төгрөгийг шийдэж өгсөн байгаа. Энэ ажил 2010 онд хийгдэж эхэлнэ. Мөн Япон улсын хөрөнгө оруулалтаар Энгельсийн гүүрийг барьж эхлэх юм. Монголын талаас шалтгаалах бүхийг л зүйлийг хийсэн байгаа. Тухайлбал, тус байгууламжийг барих газрыг чөлөөлсөн зэргийг дурдаж болно. Түүнчлэн Засгийн газраас 2010 оны төсөвт нийслэлд хийгдэх бүтээн байгуулалтын жагсаалтыг гаргаж нийт 52 тэрбум гаруй төгрөг зарцуулахаар боллоо. Баруун дөрвөн замыг олон түвшний огтлолцолтой болгох юм. Тодруулж хэлбэл гурван түвшний зам тавигдана. Нийслэлд өмнө нь ийм хэмжээний бүтээн байгуулалт хийгдэж байгаагүй. Тендер шалгаруулалтыг олон улсын хэмжээнд зарлана. Энэхүү бүтээн байгуулалтын нийт өртөг нь 45 тэрбум төгрөг. Энэ онд 24 тэрбум төгрөг батлагдсан бөгөөд дээрх 52 тэрбум гаруй төгрөгт энэхүү мөнгө тусгагдсан. Үлдсэн мөнгө нь дараа жилийн төсөвт тусгагдах юм. Засгийн газраас баталж өгсөн 52 тэрбум гаруй төгрөгийн үлдэж байгаа 30 гаруй тэрбумыг нь шинээр зам барих, шинэчлэх зэрэг ажилд зарцуулна. “ТЭЦ-4”-ийн арын замыг шинэчлэхэд 6.2 тэрбум төгрөг зарцуулахаар болсон.

 

-Бүхий л тендерийг хоёрдугаар сарын нэгний өдөр гэхэд зарласан байх бодлогыг барьж байна. Бүтээн байгуулалтын ажил дөрөвдүгээр сарын нэгний өдөр эхэлсэн байх юм. Энэ хугацаанд тендерүүд зарлагдаж, гүйцэтгэгчүүдийг нь шалгаруулж, ажлыг нь эхлүүлэх бүрэн боломжтой. Яагаад гэхлээр нийслэлд хийгдэх бүтээн байгуулалтын ажлуудын зураг төсөл нь бэлэн. Дээр нь тендертэй холбоотой нэг асуудал бол дүүрэгт зарим эрх мэдлийг шилжүүлсэн явдал. Үүнд хөндлөнгийн хяналт хэрэгтэй байдаг. Тиймээс иргэдийн хяналтыг тавихаар болсон. Энэ чиглэлээр ирэх хоёрдугаар сард олон нийтэд мэдээлэл хийж, холбогдох хүмүүсийг сургалтад хамруулах юм.

 

-Нийслэлээс сонгогдсон Улсын их хурлын 20 гишүүн байдаг. Тэгэхлээр нийт 20 тэрбум төгрөг болж байгаа. Энэхүү мөнгийг нийслэл, дүүргийн бүтээн байгуулалтад зарцуулах юм. Юунд, хэрхэн зарцуулах тухай жагсаалт удахгүй батлагдан гарна. Мэдээж тендер зарлагдан хийх ажил ч байгаа. Тендерүүдийг ч мөн хоёрдугаар сарын нэгний өдөр зарласан байна. 

 

 

-1970-аад оны технологиороо Улаанбаатар хотын гэрэлтүүлэг асаж байна шүү дээ. Энэ оны тухайд хотын нийтийн эзэмшлийн зам талбайн гэрэлтүүлэгт шинэ эргэлт хийнэ. Гадны өндөр хөгжилтэй орнуудтай хамтран ажиллахаар болсон. Энэ чиглэлийн судалгаа ч хийгдэж байна. Улсын их хурал, нийслэлээс ч хөрөнгө мөнгөн дээр нь анхаарсан. Мөн нийслэлийн хэмжээнд авто замын төлбөртэй зогсоол байгуулах ажил ч хийгдэнэ. Ингэснээр хотын замын түгжрэл тодорхой хэмжээгээр буурах болно.