Орон сууц худалдаж авахад МХЕГазраас зөвлөж байна
Barilga
2019-11-05
Хэрэв та орон сууц захиалах буюу худалдаж авах гэж байгаа бол дараах зүйлийг судалсны үндсэн дээр шийдвэрээ гаргахыг МХЕГ-аас зөвлөж байна. Тухайлбал:
- Тухайн барилгын газар олголтын захирамж, гэрээ, гэрчилгээ хүчин төгөлдөр эсэх, техникийн нөхцлийг холбогдох байгууллагаас бүрэн авсныг нарийвчлан үзэх, барилгын зураг төслийг баталсан зургийн даалгаврын дагуу боловсруулж, хуулийн дагуу зураг төсөлд бүрэн магадлал хийсэн эсэхийг үзэж, гаргасан дүгнэлттэй нь танилцах,
- Барилга угсралтын ажил эхлэхдээ мэргэжлийн хяналтын байгууллагаас зөвшөөрөл авсан эсэх, захиалагч, гүйцэтгэгчийн эдийн засгийн чадамж, дадлага, туршлагыг судалж мэдэх, тухайлбал урьд нь барьж ашиглалтад оруулсан орон сууцны барилгын чанар, оршин суугчдын санаа бодлыг мэдэх,
- Гүйцэтгэгч, захиалагч байгууллагын өр, авлагын тухай мэдээллийг харьяа татварын албанаас лавлах, энэ тухай лавлаж мэдэхийг санхүүгийн чадвартай аж ахуйн нэгж, байгууллага санал болгодог.
- Барилга угсралтын ажлын чанарын талаар зураг төсөл зохиогч, мэргэжлийн хяналтын байгууллагаас албан ёсоор өгсөн дүгнэлт, албан шаардлага, санал, зөвлөмж гарсан эсэхийг тодруулж, танилцах
- Барилгын ажлын явц, чанарын талаарх мэдээллийг тодруулж, барилгын мэргэжилтэй хүнд үзүүлж, мэргэжлийн зөвөлгөө авах
- Орон сууц захиалж, гэрээ байгуулахдаа албан ёсны захиалагч хэн болохыг тогтоож, зөвхөн түүнтэй гэрээ байгуулах. Ингэхдээ захиалагчийн санал болгож буй гэрээний төслийн заалт бүрийг судалж, гэрээлэгч талуудын эрх адил тэнцүү байгаа эсэх, хүлээх хариуцлага аль хэр тодорхой тусгасныг хуулийн мэргэжилтнээс зөвөлгөө авч, гэрээнд нэмэлт оруулах эсэхээ шийдэх
- Захиалагчийн санал болгосон гэрээний төслийг судлахгүй шууд гарын үсэг зурж баталгаажуулах нь танд эрсдэл авчрах магадлалтайг анхаарах
- Гэрээнд заасан орон сууцны талбай бодит байдал дээр зөрүүтэй байгаа талаар маргаан их гардаг тул тухайн барилга барьж байх явцад буюу дотор ханын өрлөг өрөх үед зураг төсөл зохиогч, захиалагч, гүйцэтгэгчийг байлцуулан хэмжилт хийж, гэрээнд заасан талбайн хэмжээг баталгаажуулах
- Та барьж буй барилгаас орон сууц худалдан авахаар захиалагчтай гэрээ байгуулсан бол барилгын ажлын явц, чанарт хяналт тавих үүрэгтэй, бас эрхтэй. Шаардлагатай гэвэл энэ эрх, үүргээ зураг төсөл зохиогч, мэргэжлийн хяналтын байгууллагатай хамтран хэрэгжүүлэх
- Барилгад хэрэглэж буй материал, хийц, бүтээцийн чанар зураг төсөл болон хүчин төгөлдөр мөрдөж байгаа стандартын шаардлага хангасан эсэх баталгаа, дүгнэлт, лабораторийн шинжилгээний дүнг шаардах
- Барилгыг ашиглалтад өгөхийн өмнө тухайн барилгын талаар санал, дүгнэлт, анхаарах асуудлын талаар барилга хүлээж авахад оролцдог холбогдох байгууллагад ирүүлж арга хэмжээ авах
- Улсын хүлээж аваагүй буюу комисс ажилласан ч акт баталгаажаагүй байхад захиалагчийн шахалт, хүсэлтээр орон сууцандаа орохгүй байх шаардлагатай. Барьж дууссан барилгаас орон сууц худалдаж авахад эхний ээлжинд барилга хүлээж авсан тухай улсын комиссын актыг эх хувиар нь үзэх, оршин суугчдын санал зөвлөмжийг авах
- Банкны зээлд хамрагдах гэж байгаа бол зээлийн хүүг судлах шаардлагатай гэжээ.