Эрүүл мэндийн сайдын тушаалаар эрүүл мэндийн салбарын төрийн байгууллагад ногдсон 679 орон сууцыг хуваарилах, төрийн албан хаагчдыг орон сууцны урт хугацаатай зээлд хамруулах ажлыг зохион байгуулах үүрэг бүхий ажлын хэсгийг тус яамны Төрийн нарийн бичгийн дарга Н.Хүрэлбаатараар ахлуулан байгуулжээ.

 

Ажлын хэсгийн анхдугаар хуралдаан саяхан хуралдаж, эрүүл мэндийн салбарын төрийн байгууллагуудад ногдсон дээрх тооны орон сууцыг хуваарилах зарчим, тооны талаар хэлэлцээд, харьяа төрийн байгууллагуудад хуваарилах орон сууцны тоог тогтоосон байна. Тухайн байгууллагын төрийн албан хаагчдын эзлэх хувийг тооцсоны үндсэн дээр орон сууцны тоог тогтоожээ. Энэхүү хуваарилалтад нийт 42 төрийн байгууллага хамрагдсан бөгөөд тухайн байгууллага нийт ажилчдын хурлаар хэнд байр олгохоо хэлэлцэн тогтоож, шалгуур хангасан төрийн албан хаагчдын орон сууцны зээлд хамрагдах хугацааны дарааллыг тодорхой болгох гэнэ. Орон сууцны зээлд хамрагдах төрийн албан хаагчийн нэр, холбогдох баримт бичгийг Орон сууцны санхүүжилтийн корпорацид улирал тутамд хүргүүлнэ. Эхний ээлжинд буюу нэгдүгээр улиралд орон сууцны зээлд хамрагдах төрийн албан хаагчдын нэрсийг ирэх сарын нэгний дотор хүргүүлсэн байх аж.

 

Монцамэ