Барилгын үндсэн материал болох арматур, швеллер бусад төмөр бүтээгдэхүүний үнэ өмнөх жилийн мөн үеэс 60 хувиар нэмэгджээ. Өнгөрсөн хавар зах зээлд Дарханы төмөрлөгийн үйлдвэрийн A3, 12, 16-гийн арматур тонн нь 640 мянга, 18, 20, 22, 24-ийн арматур 700 мянган төгрөг байсан бол өнгөрсөн сараас 800 мянган төгрөг болж өсчээ.
Манай улсын барилгын металл хийцийн материалын хэрэгцээг Дарханы хар төмөрлөгийн үйлдвэр болон дотоодын жижиг үйлдвэрүүд хангадгаас гадна ОХУ, Хятад улсаас импортлон борлуулдаг. Өнөөдрийн байдлаар, Дарханы хар төмөрлөгийн үйлдвэр нийт хэрэгцээний 30 хувийг л хангадаг аж. Өмнөх жил барилгын төмөр материалын үнэ харьцангуй тогтвортой байсан боловч энэ жил ийнхүү өссөн шалтгааныг мэргэжлийн хүмүүс нөөц байхгүй болсонтой холбон тайлбарлаж байгаа.
Нөгөөтэйгүүр төмрийн үнэ өссөн шалтгаануудыг мэргэжилтнүүд тайлбарлахдаа барилга их барьж байгаа, хувийн төмрийн үйлдвэрүүдийг хотоос шахсан, импортын үнэ нэмэгдсэн зэрэгтэй холбон тайлбарлаж байна.