Нийслэлийн Засаг даргын зөвлөл өчигдөр ээлжит бус хуралдаан хийж, Клиникийн нэгдүгээр амаржих газрын бохир усны системийн засвар үйлчилгээнд шаардлагатай 17 сая төгрөгийг Засаг даргын нөөцөөс гаргахаар шийдлээ.

 

Нийслэлийн Эрүүл мэндийн газар/НЭМГ/-ын дарга Ц.Ганхүү, клиникийн нэгдүгээр амаржих газрыг суллаж, халдварын бус эмгэгтэй 4 нярайг хүүхдийн клиник сувилал руу, халдварт өртсөн 12 нярайг ЭНЭШТ-ийн Нярайн эмгэгийн тасагт шилжүүлэн тусламж үзүүлж байна. Одоогоор 12 хүүхдийн хоёроос бусдынх нь бие гайгүй байна гэж уг хуралдааны үеэр мэдээллээ. Клиникийн нэгдүгээр амаржих газрын эмнэлгийн тусламжийг хувийн хэвшлийн эрүүл мэндийн байгууллагууд үзүүлж байгаатай холбогдуулан нэн шаардлагатай эм тариа, багаж, хэрэгслийн тооцоо судалгаа гаргаж, ЭМЯ-нд явуулсны дагуу эм тариа, нэг удаагийн эмнэлгийн хэрэгсэл, багаж хэрэгсэл олгожээ. НЭМГ-аас томилогдсон ажлын хэсгийнхэн эдгээр байгууллагын тусламж үйлчилгээний байдлыг тогтмол хянаж, хэвийн үйл ажиллагааг нь ханган ажиллаж байна.

 

Нийслэлийн Мэргэжлийн хяналтын газрын барилгын техникийн хяналтын болон эрчим хүчний улсын байцаагч нар тус барилгын ариутгах татуургын гаргалгаа шугамыг шалгаж, дүгнэлт өгсний дагуу Ус сувгийн удирдах газраас 80 метр бохирын шугамын засвар цэвэрлэгээ хийж, лагийг цэвэрлэж, халдваргүйжүүлэн зөөсөн байна.

 Улаанбаатар хотын Барилга хот байгуулалт, төлөвлөлтийн газраас хийсэн тооцоогоор 1971 онд ашиглалтад орсноосоо хойш их засварт ороогүй энэ амаржих газарт иж бүрэн засвар хийхэд 2,1 тэрбум төгрөг шаардагдах юм. Нийслэлийн Засаг дарга энэхүү тооцоо, судалгааг ЭМЯ-нд танилцуулж, Засгийн газрын хуралдаанаар хэлэлцэхэд бэлтгэхийг нийгмийн асуудал хариуцсан орлогч дарга Ц.Цогзолмаа, НЭМГ-ын дарга Ц.Ганхүү нарт даалгалаа.

 

Засаг даргын зөвлөлийн хурлаар хэлэлцсэн асуудалтай холбогдуулан нийслэлийн Засаг дарга бөгөөд Улаанбаатар хотын захирагч Г.Мөнхбаяр эрүүл мэндийн байгууллагуудын үйл ажиллагааг анхааралдаа авч, шалгалт явуулахыг дүүргийн удирдлагуудад үүрэг болголоо. “Нэгдүгээр амаржих газарт гарсан нөхцөл байдалтай танилцаж байх үеэр эмнэлгийн дотоод үйл ажиллагаа,сахилга баттай холбоотой зөрчил дутагдал ч байсан. Ариутгах татуургууд нь бүрэн хэмжээгээр ажилладаггүй байхад л шаардлагатай арга хэмжээ авалгүй явсаар байгаад ийм байдалд хүрсэн” гэдгийг дурдлаа.

 

“Бид ажил, амьдралын төлөө зүтгэж байгаа хүмүүст саад болохгүй. Харин бусдын эрх ашгийг хохироосон үйлдлийг шууд таслан зогсоох арга хэмжээ авна. Ялангуяа хүний амь настай холбоотой асуудал яригдсан тохиолдолд асуудлыг эргэж харах гэсэн яриа байхгүй. Хотын бодлого нээлттэй, иргэдэд ойлгомжтой байх ёстой “ гэж анхаарууллаа.

 

Түүнчлэн мэргэжлийн байгуул­лагуудаас тавьж байгаа шаардлагыг хүлээж авах байдал хаа сайгүй сул байгаад анхааран ажиллахыг Захирагчийн ажлын алба, Нийслэлийн мэргэжлийн хяналтын газрынханд даалгалаа.