Төмөр замын гол сүлжээ, говийн бүсийн уул уурхайн томоохон ордуудыг түшиглэж байгуулах цогцолбор нь Монгол Улс түүхий эд бэлтгэн нийлүүлэгч биш, эцсийн боловсруулалт хийгээд, экспортод гаргадаг улс орон болоход томоохон хувь нэмэр оруулна гэж төсөл санаачлагчид үзэж байгаа юм. Манай улсын эдийн засагт ч бодит нөлөө үзүүлнэ гэж Зам тээвэр, барилга, хот байгуулалтын сайд Х.Баттулга онцлон хэлж байсан.

Хүнд аж үйлдвэрийн цогцолбор байгуулснаар 2015 он гэхэд манай улсын ДНБ 14 хувиар өсч, нэг хүнд 5000 ам.доллар ноогдох бодит боломж байгааг төсөл боловсруулагчид тооцжээ. Түүнчлэн ажлын байр нэмэгдэж, нэмүү өртөг шингэсэн эцсийн бүтээгдэхүүнээ хөрш зэргэлдээ орнуудаас гадна Энэтхэг, Япон, Өмнөд Солонгос зэрэг дэлхийн бусад улс оронд экспортолж эхлэх юм байна.  

Одоогоор манай улс босоо тэнхлэгт ганц төмөр замтай. Хэрвээ Сайншандад аж үйлдвэрийн парк байгуулбал хөндлөн чиглэлд Чойбалсантай шууд холбосон төмөр зам тавих шаардлагатай юм байна. Түүхий эд, эцсийн бүтээгдэхүүнээ зөвхөн  өмнөд хөршид нийлүүлдэг, ганцхан улсын зах зээлээс хараат байх нь манайд ашиггүй. Харин Сайншанд Чойбалсанг төмөр замаар холбосноор Европын зах зээл рүү хямд зардлаар гарах боломж нээгдэх нь ээ. Төмөр замаас гадна агаарын тээвэр хөгжүүлэх боломж ч энэ бүс нутагт байгаа юм байна.

Аж үйлдвэрийн цогцолбор байгуулахад усны нөөц тун чухал. Харин Дорноговь аймгийн хувьд гүний усны арвин нөөцтэй болох нь нэгэнт тогтоогдсон.  1980-аад оны үед ЗХУ-ын усны хайгуулчид Дорноговь аймгийн төвөөс 30 км-ийн зайтай Бор төөрмийн говь гэдэг газарт усны арвин нөөц байгааг илрүүлжээ. Тухайн үед ухаж гаргасан худагнаас одоо ч ус оргилсоор байна. Гоожуур, хязгаарлагч хийсэн ч  усны хүчийг хааж дийлэхгүй байгаагаа нутгийн удирдлага хэлж байсан. Чухамдаа Сайншанд аж үйлдвэрийн цогцолбор барихад тохиромжтой бүс нутаг гэдгийг энэ давуу тал ч баталж байгаа юм байна.

Цайртминералаас Дорноговийн өртөөгөөр дамжин өдөрт 17-20  вагон цайрын баяжмал урьд хөрш рүү гардаг байна. Энэ баялагтаа эцсийн боловсруулалт хийвэл олон хүн ажлын байртай, ашиг орлоготой болж, амьдрал нь сайжирна.

Манай улс 1949 онд Дорноговь аймгийн Зүүн баян багийн нутаг дэвсгэрээс  анх нефть гаргаж байсан түүхтэй. Харамсалтай нь, олборлолт хийлгүй орхижээ. 2003 оноос “Доншин-Монгол” компани энэ газарт олборлолт хийж эхэлсэн байна. Түүхий нефтиэ мөн л өмнөд хөрш рүү шууд зөөвөрлөдөг. Харин Дорноговь аймагт ямар нэг татвар төлж, ашиг оруулдаггүй юм байна. Бүтээгдэхүүн хуваах гэрээ Монгол Улсын Засгийн газартай байгуулсан. Нефтиэ борлуулсан ашгаасаа үйлдвэрлэлийн зардлаа хасаад, үлдсэн мөнгөө манай засгийн газартай хуваадаг.

Жилдээ 70 мянган тонн түүхий нефть Хятадад экспортолж байна.  Энийг бид дотооддоо боловсруулж, шатахуун үйлдвэрлэсэн бол хэд дахин их ашиг олох боломжтой байсан.  Тиймээс ч Сайншандад аж үйлдвэрийн цогцолбор байгуулах ажлыг хурдан хугацаанд эхлүүлэх хэрэгтэй гэж төсөл боловсруулагчид үзэж байлаа.
Хэрэв та бүхэн Сайншандын Аж Үйлдвэрийн Паркын төсөл энд дарж татаж авна уу.
http://www.mrtcud.gov.mn/libraries/tosol/mon.pdf