Энэ сарын 28-ны өдөр Эрчим хүчний зохицуулах газрын Зохицуулагчдын зөвлөлийн хурлаас ирэх нэгдүгээр сарын 15-ны өдрөөс цахилгааны үнийг 17.35, дулааны үнийг 14.5 хувь нэмэгдүүлэхээр шийдвэр гаргасныг эсэргүүцэн МҮЭ-ийн холбооны ерөнхийлөгч С.Ганбаатар Ерөнхий сайдад хандан нийгмийн түншлэгч талуудын хамт зөвшилцлийн ширээний ард суухыг уриалан ил захидал илгээлээ.

 

Уг ил захидалд, Цахилгаан дулааны үнийг нэмэгдүүлэх замаар эрчим хүчний компаниудын алдагдлыг нөхөхөөс өөр хөрөнгө оруулалтын бусад арга хэмжээ авах замаар шийдвэрлэх боломжтой эсэх талаар мэргэжлийн шинжээчдийн дүгнэлт гаргалгүй огцом шийдвэр гаргасныг эрс эсэргүүцэж байна. Өнөөдрийг хүртэл эрчим хүчний салбарт нүүрлээд байгаа өр авлагын сүлжээ нь эдгээр байгууллагын удирдлагыг хэрэгжүүлж байгаа төр буюу түүний үр дүнгүй үйл ажиллагаа, алдаатай удирдлагатай шууд холбоотой. Иймээс төр өөрийн үйл ажиллагааны сөрөг үр дагаврыг туйлдсан ард түмнийхээ нуруун дээр нэмэлт хүнд ачаа болгон үүрүүлэхээр шийдвэрлэсэн нь төрийн бодлого алдагдаж байгаа хэлбэр гэж үзэж байна гэжээ. Засгийн газраас иргэдийн цалин хөлс, хөдөлмөрийн хөлсний доод хэмжээ, тэтгэвэр, тэтгэмжийг нэмэгдүүлэх талаар арга хэмжээ аваагүй энэ үед эрчим хүчний үнийг нэмэгдүүлснээр жижиг дунд үйлдвэрийг сөхрүүлэх, ажлын байрыг цөөрүүлэх зэрэг олон сөрөг үр дагаврыг дагуулна гэж МҮЭ-ийн холбоо үзэж байгаа юм. Тиймээс нийгмийн түншлэгч талуудыг яаралтай зөвшилцлийн ширээний ард суулгахыг уриалж, зөвшилцлийг өнөөдрийн 15 цагаас хойшлуулахгүйгээр хийх саналтай байгаагаа мэдэгджээ.

 

Монцамэ