Баярын өдрүүдэд нийслэлд 30 градус хүртэл хүйтэрч, бага хэмжээний цас өдөр бүхэн хаялж байсан. Цас орсны дараагаар төв талбайг болон бусад гудамж талбайг дүүргүүдийн хариуцлагатай жижүүрүүд, Улаанбаатар зам засвар арчлалтын газраас хамтарч цэвэрлэж байжээ.

 

Энэ тухай нийслэлийн шуурхай зөвлөлгөөний үеэр хотын ерөнхий менежер Ч.Бат мэдээлээд “Цас арилгах бодис 172 тн, давс 80 тн байна. Халтиргаа арилгах бодисын нөөц энэ өвөлд хангалттай хүрэлцэхээр байгаа” гэлээ. Мөн тэрбээр баярын өдрүүдэд ТҮК-үүд хэрхэн ажилласан талаарх мэдээллийг хотын удирдлагуудад хүргэлээ. Баянзүрх дүүрэг дөрвөн тонн бодис цацсан. Замын халтиргаа гайгүй байгаа гэсэн мэдээлэл өгчээ. Чингэлтэй 2,5 тн бодис, Баянгол зургаан тн бодис, 10 тн элс цацсан. Сүхбаатар гурван тн, Сонгинохайрхан 10 тн бодис, Хан-Уул долоон тн давс, таван тн бодис цацаж, халтиргаа гулгааг багасгах арга хэмжээ авчээ.

 

Гэсэн ч удирдлагууд “Хотын замд халтиргаа гулгаа арилаагүй байна. Халтиргаа арилгах ажлыг халтуурдаж болохгүй, энэ ажлыг улам эрчимжүүл” гэсэн үүрэг өглөө. Өнгөрсөн ням гаригт Баянгол дүүргийн Төмөр замын 29 дүгээр байрны дулааны шугам хагарсан бөгөөд хотын ерөнхий менежерээр ахлуулсан ажлын хэсэг ажиллаж, 21 цагт халаалт хэвийн байдалд орсон байна.