Барилга МН

ЗТБХБЯам, ОССКорпораци, Барилга.МН БЗМТөв хамтран “Орон сууц 4000” сэдэвт семинарыг 2010 оны 01-р сарын 05-ны өдөр Рокмон бьюлдингийн хурлын танхимд зохион байгууллаа.

 

“Орон сууц 4000” семинарт барилга угсралтын нийт 80 гаруй компанийн удирдах ажилтнууд оролцож санал бодлоо солилцож, өөрсдийн сонирхож буй асуултандаа ОССК-ийн гүйцэтгэх захирал Ж.Алдаржавхлан зэрэг “Орон сууц 4000” дэд хөтөлбөрийг хэрэгжүүлэж буй эрх бүхий албан тушаалтнуудаас хариулт авлаа. Барилга угсралтын компаниудын зүгээс банкны зээллэгтэй, мөн 1 м2 нь 650,000 төгрөгөөс дээш үнийн дүнтэй компаниуд энэ хөтөлбөрт хамрагдаж болох эсэхийг голчлон сонирхож байлаа.

 

Засгийн Газар болон ОССК-ийн зүгээс зөвхөн банкны зээлэнд байгаа 650,000 төгрөгөөс доош үнэтэй байрнуудад зээл олгоно гэсэн байрь суурьтай байсан юм. Семинарт ирсэн барилгын компанийн төлөөлөгчид төр засгаас 650,000 төгрөгөөр 1 м2 байрыг үнэлж буй нь өнөөгийн зах зээлд боломжгүй үнэ, хэт алдагдалтай байна гэсэн байр сууриндаа хатуу зогсож байлаа.

 

ОССК-ийн удирдлагууд журмын талаар мэдээлэл хийж, хүмүүсийн сонирхсон асуултанд хариулт өглөө.

Мөн БАРИЛГА.мн БЗМТөвөөс ОНЛАЙН ЭКСПО болон BARILGA.mn вэб сайтынхаа шинэ хувилбарыг танилцуулж, байгууллагуудын сонирхсон асуултанд хариулт өгсөн юм.