Мянганы сорилтын нэгтгэлийн удирдах зөвлөлийн хурлаар төмөр замын төслийн хөрөнгийг хоёр шинэ төсөлд шилжүүлэн батлаад байгаа билээ. Үүний нэг нь “Цэвэр агаар” төсөл бөгөөд 47.2 сая ам.доллар зарцуулна.

 

Манай улсын нийслэл Улаанбаатар хотод урт үргэлжилдэг өвлийн улиралд бохирдлоос үүдэн агаарын чанар ихээхэн муудаж байгаа. Агаарын бохирдлын гол хэсэг нь нийслэлийн гэр хороололд чанар муутай, хямд нүүрсийг халаалтад хэрэглэснээс үүсдэг. Улаанбаатарын агаарын бохирдол олон улсын агаарын аюулгүй байдлын стандартаас 2-10 дахин их байгаа юм.

 

Дээрх төслийг бусад хандивлагч орнуудтай хамтран цэвэр технологийг дэмжих сан байгуулах, үндэсний эрчим хүчний үйлдвэрлэлд салхины эрчим хүчийг ашиглах ажиллагааг дэмжихэд чиглүүлэх бөгөөд эрчим хүчний хэмнэлттэй түлшийг гэр хорооллын өрхүүдэд хэрэглэж заншуулах, сэргээгдэх эрчим хүчний хөгжлийг дэмжих замаар Улаанбаатар хотын агаарын бохирдлыг бууруулах зорилготой юм. Энэ төслийг хэрэгжүүлснээр түлш, эрүүл мэндэд зарцуулах зардлаа бууруулах, эрүүл байснаар бүтээмж нэмэгдэх зэргээр үр ашгийг нь хүртэх боломжтой болох ажээ.

 

 

Монцамэ