Эрдэнэт хотод Монголын анхны ангижруулсан ган төмөр үйлдвэрлэж эхэллээ. Бид “Хөх ган” ХХК-ийн зарим удирдлагатай уулзаж энэ талаар тодруулсан юм.

 

 

-Манай үйлдвэрийн нэг зуух жилд 15 мянган тонн төмрийн ангижруулсан бүтээгдэхүүн үйлдвэрлэх хүчин чадалтай. Бид эхний нэг зуухыг ашиглалтанд оруулаад ажиллаж байна. Бүтээгдэхүүнийнхээ дээжийг Дарханы Төмөрлөгийн үйлдвэрт нийлүүлэх гэрээ хийсэн. Цаашид бүтээгдэхүүнээ экспортод гаргах бодлого баримталж байгаа. Үйлдвэрийн хоёр дахь зуух ашиглалтанд орохоор жилд 30 мянган тонн ангижруулсан ган төмөр үйлдвэрлэнэ гэсэн үг. Өөрөөр хэлбэл хоёр дахь зуух энэ жил ашиглалтанд орно. Үйлдвэрийн анхны туршилтын хугацаанд хөдөлмөрийн бүтээмжийг 50 хувь нэмэгдүүлээд байна.

 

Архангай аймгийн Төвшрүүлэх сумын төмрийн ордны уурхайд манай “Бэрэн” компани ажиллаж энэ үйлдвэрийн түүхий эдийг бэлтгэн нийлүүлж байгаа. Харъяа компани маань тэнд төмрийн хүдэр баяжуулах томоохон үйлдвэртэй болсон болохоор баяжуулсан төмрийн хүдрийг Эрдэнэтэд авчраад ангижруулан ган төмөр гаргаж байгаа юм.

 

Манай компани цаашид дэлхийн стандартад нийцсэн бүтээгдэхүүн үйлдвэрлэх зорилго тавин ажиллаж байна. Саяхан бүтээгдэхүүнийхээ дээжийг Азийн ийм үйлдвэрлэлийн шинжилгээнд явуулсан бөгөөд үр дүн нь маш сайн гарлаа. Одоогоор Солонгос, Япон, Хятад улс манай бүтээгдэхүүнийг авах саналаа ирүүлээд байна. Цаашид Европын холбооны улсууд руу бүтээгдэхүүнээ гаргах зорилготой байгаа.

 

Манайх Монгол орны газрын хэвлийгээс олборлосон ашигт малтмалаар ган төмөр үйлдвэрлэж буй анхны компани. Монголчууд өөрсдөө төмөр үйлдвэрлэж эхэлснээр дэлхийн зах зээл дээр нэг алхам урагшилж байна гэсэн үг юм.

 

Өнөөдрийн байдлаар манай үйлдвэр энэ оны тавдугаар сар хүртэл ашиглах түүхий эдээр хангагдсан. Тухайлбал, Булган аймгийн Мааньтаас шохой, Эрээний уурхайгаас нүүрс татаад байна гэв.

 

-”Хөх ган” ХХК, Эрдэнэт хотноо Төмрийн ангижруулах үйлдвэр ашиглалтанд оруулснаар 2009 онд 108 хүнийг ажлын байртай болголоо. 2007-2008 онд ажилд авсан хүмүүстэйгээ нийлээд 230 хүн ажиллаж байна. Үйлдвэрийн үндсэн цехийн ажиллагсад гурван ээлжээр ажилладаг. Манай ажилчдын ихэнх нь залуучууд. Үйлдвэр маань Говил багийн нутаг дэвсгэрт байрлалтай болохоор энэ багийн иргэдээс олон арван хүнийг ажилд авсан. Үйлдвэрийн нийт ажиллагсдын 40 хувь нь Говил багийн иргэд шүү дээ. Ирэх оны тавдугаар сард хоёр дахь зуух ашиглалтанд ороход дахиад 150 хүнийг ажлын байраар хангана. Манай үйлдвэр Хятадын технологиор баригдсан, гар ажиллагаа ихтэй учраас мэргэжилгүй залуучуудыг сургаж дадлагажуулан ажиллуулж байна. Харин бусад нарийн мэргэжлийн ажилтнуудыг өөрсдөө сонгон авч ажиллуулж байгаа.

 Мөн жижиг дунд үйлдвэрлэлийг дэмжих ажлын хүрээнд Эрдэнэт хотод өөрийн 60 хувийн хөрөнгө оруулалттай “Цэвэр металл” ХХК-ийг байгуулаад байна. Энэ компани “Хөх ган” үйлдвэрийн ангижруулсан ган төмрөөр ган бөмбөлөг үйлдвэрлэхийн зэрэгцээ ангижруулсан ган төмрөө хайлаад цэвэршүүлсэн цэвэр металл гаргах туршилт явуулж байна. Саяхан хийсэн анхны туршилтаар 99.96 хувийн цэвэр ган төмөр гарган авсан. Цэвэршүүлсэн ган төмрийг цаашид экспортлох ажил хийгдэнэ гэж ярилаа.