Монгол Улс, ОХУ-ын Ерөнхийлөгч нарын байгуулсан Стратегийн түншлэлийг хөгжүүлэх тухай тунхаглалд үндэслэгдэн хоёр орны харилцаа улам бүр гүнзгийрэн хөгжиж байгааг Элчин сайд Д.Идэвхтэн уулзалтын үеэр дурдаад Эрхүү муж Монгол, Оросын харилцаанд, ялангуяа худалдаа, боловсрол, соёлын хамтын ажиллагаанд томоохон үүрэг гүйцэтгэж ирсэн билээ. Эрхүү хотод манай орны олон арван мянган залуучууд боловсрол эзэмшсэн. ОХУ-аас Монгол Улсад импортолж буй нийт бүтээгдэхүүний үлэмж хэсгийг тус муж нийлүүлдэг. Цаашид ч хоёр орны худалдаа, эдийн засаг, соёл, боловсрол, хүмүүнлэгийн харилцаанд Эрхүү муж томоохон үүрэг гүйцэтгэсээр байх болно гэдэгт итгэлтэй байна гэж тэмдэглэн хэлэв. Тэрбээр цааш нь Монгол Улсад тохиолдоод байгаа зудын гамшигт байдал, түүний үр дагавар, хохирлын талаар болон ОХУ-ын Засгийн газар, бүс нутгийн засаг захиргаа,аж ахуйн нэгж, хувь хүмүүсийн үзүүлж буй хүмүүнлэгийн тусламжийн талаар яриад өчигдөр гэхэд л Кемерово мужийн засаг захиргаа 500 мянган рублийн тусламж үзүүлсэнийг тэмдэглэн хэлэв.

Төлөөлөгчийн газрын тэргүүн И.Хоменко Элчин сайдад хүлээн авч уулзаж байгаад нь талархал илэрхийлээд Орос улсад дээд сургууль, улмаар академи дүүргэсэн, хоёр орны парламент хоорондын харилцааг хөгжүүлэхэд үнэтэй хувь нэмэр оруулж ирсэн, Оросын ард түмний соёл, хэл, зан заншилыг сайн мэдэх хүн Элчин сайдаар томилогдон ажиллаж байгаад баяртай байна. Хэдийгээр би тантай анх удаа уулзаж байгаа боловч эртний сайн танилтайгаа илэн далангүй, дотны яриа өрнүүлж байгаа мэт сэтгэгдэл төрж байна. Таны дэвшүүлж буй санал, байр суурийг ажил хэрэг болгоход мужийг төлөөлөн Холбооны Засгийн газрын дэргэд ажиллах хугацаандаа чармайн ажиллах болно гэж тэмдэглэн хэлэв.

 

Энэ үеэр Элчин сайд Д.Идэвхтэн Эрхүү мужид нефтийн томоохон ордууд нээгдэж, нөөц нь өссөөр байгаа тухай дурдаад тус мужаас түүхий нефть импортолж, Монголд нефть боловсруулах үйлдвэрлэлийг хөгжүүлэх сонирхолтой байгаагаа онцлон тэмдэглэж, энэхүү зорилтыг нь хэрэгжүүлэхэд дэмжлэг үзүүлж ажиллахыг Төлөөлөгчийн газрын тэргүүн И.Хоменкогоос хүслээ.

 

Монцамэ