Энэ долоо хоногийн бямба гаригаас эхлэн Гурвалжингийн гүүрийн замын хөдөлгөөнийг хэсэгчлэн хаахаар болжээ. Тодруулж хэлбэл 3.5 тонноос дээш даацтай тээврийн хэрэгсэл Гурвалжингийн гүүрээр зорчихгүй юм байна. Энэ талаар Нийслэлийн Авто замын газрын Зам барилгын хяналтын хэлтсийн дарга Г.Баттогтохоос тодрууллаа.

-Гурвалжингийн гүүрийн их засварыг эхлүүлэхээр болсон байна. Яг хэзээнээс энэ ажил эхлэх гэж байна вэ?

-Гурвалжингийн гүүр 1989 онд ашиглалтад орсноосоо хойш засвар хийгдэлгүй өнөөг хүрсэн. Гүүрийг завсарлах тендерийг дахин зарлаж  “Эйч Кэй Би интернэйшнл холдинг” компани гүйцэтгэхээр боллоо. Энэ сарын 20-ны өдрөөс тус гүүрээр 3.5 тонноос дээш даацтай тээврийн хэрэгслийг зорчуулахгүй байхаар болж байна. Тавдугаар сарын нэгний өдрөөс наймдугаар сарын 25-ныг хүртэлх хугацаанд бүх төрлийн тээврийн хөдөлгөөнийг хаах юм. Засварлах хөрөнгийг Монгол улсыг хөгжүүлэх сангаас гаргах бөгөөд нийт өртөг нь нэг тэрбум 998 сая төгрөг болж байгаа.

-Өмнө нь гүүрийг засварлана гэж тодорхой хэмжээний мөнгийг нь авчихаад ажлаа хийж чадаагүй “Аваргас” компанид ямар хариуцлага оногдуулж байна вэ?

-Ажлаа хийж чадаагүй учраас өнгөрсөн онд тус компанитай байгуулсан гэрээгээ цуцалсан. Энэ асуудал шүүхэд шилжсэн байгаа.

-Одоо шалгараад байгаа “Эйч Кэй Би интернэйшнл холдинг” компани хэр найдвартай газар вэ?

-Тендерт хэд хэдэн компани өрсөлдөж, хуулийн дагуу Гурвалжингийн гүүрийг “Эйч Кэй Би интернэйшнл холдинг” компани засварлахаар болсон. Тус компанийн тухайд өмнө нь нийслэлийн бүтээн байгуулалтад оролцож байсан. Тухайлбал, 32-ын тойргийн замыг барьсан байгаа. Мэдээж тендерийнхээ хуулийн дагуу гүүрэн байгууламж барих, засварлах тусгай зөвшөөрөл тус газарт бий.

-Тун удахгүй нийслэлд зам засварын ажил эхэлнэ. Томоохон ямар ажил хийгдэх бол?

-Нийт зургаан газарт замын өргөтгөл, шинэчлэлтийн ажил хийгдэнэ. Бага тойруугийн замыг өргөтгөнө. Мөн Нарны замын баруун, зүүн тал буюу Нарантуул олон улсын худалдааны төвөөс Чулуун овоот, вокзалаас 10 дугаар хороолол орох замыг шинэчилнэ. Сүхбаатарын гудамж буюу нийслэлийн төв талбайн баруун талын замаас 32-ын тойрог хүртэлх замыг засна. 100 айлын уулзвараас Сэлбэ гол хүртэлх 300 метр замыг өргөтгөхөөр болсон. Эдгээр ажил бүгд санхүүжилт нь эргэн төлөгдөх нөхцөлтэйгээр хийгдэх юм.  Үүнээс гадна 18 замыг шинэчлэх саналыг Засгийн газарт оруулаад байгаа. Хэрвээ энэ асуудал шийдэгдвэл санхүүжилт нь мөн эргэн төлөгдөх нөхцөлтэйгээр хийгдэх болно.

-Энгельсийн гүүрийг барих ажил ямар шатандаа байна вэ?

-Монголын талаас газар чөлөөх зэрэг ажлыг ерөнхийдөө хийж дуусч байна. Энэ гүүрийг Японы Засгийн газрын буцалтгүй тусламжаар барих бөгөөд 2012 оны аравдугаар сард ашиглалтад орсон байх юм.

Гурвалжингийн гүүрээр 3.5 тонноос дээш багтаамжтай тээврийн хэрэгсэл явуулахгүй болсонтой холбогдуулан тус гүүрээр зорчин өнгөрдөг нийтийн тээврийн хоёр чиглэлд өөрчлөлт хийх юм байна. 12 дугаар чиглэл буюу “Ган хийц-Зайсан-Ханийн материал”-ийн автобус Сөүлийн гудамжаар явах аж. Харин 19 дүгээр чиглэл буюу “Ээрмэл”-ийн автобус Саппорогийн тойргоор буцаж эргэн хорооллоор дайран үйлдвэрлэл рүү явах урьдчилсан төлөвлөлтийг нийслэлийн Тээврийн газраас гаргаад байна.

Улаанбаатар Таймс