Энэ жил Тээврийн товчоо орчмоос “Нарны зам” болон төмөр замыг давуулан Энгельсийн гудамж буюу Цахилгаан түгээх сүлжээ компанийн хажуугаар Хан-Уул дүүргийн Цагаан хаалга хүрэх нийт 895 метр урттай гүүрийн барилгын ажлыг ирэх сарын 29-нд эхлүүлэхээр товлоод байна.

 

Тус төслийг хэрэгжүүлэх талаар зөвлөлдөх анхны уулзалт өчигдөр болж хотын удирдлага, ЗТБХБЯ-ныхан, цахилгааны болон дулааны шугам сүлжээний уг ажлыг хариуцсан инженерүүд, гүйцэтгэгч болон зөвлөхөөр оролцох Японы компанийн төлөөлөл оролцлоо.

 

Гүүрэн гарцын захиалагчаар ЗТБХБЯ, хэрэгжүүлэгч нь НЗДТГ, Нийслэлийн Захирагчийн ажлын алба, Японы олон улсын хамтын ажиллагааны “ЖАЙКА” байгууллага, зөвлөхөөр Японы “СиТи Ай” компани, гүйцэтгэгчээр “Жэй Эф И” компани оролцох юм. Гэрээнд заасны дагуу барилгын материал, тоног төхөөрөмж, ажиллах хүн хүчээ аль нэг гуравдагч улсаас авахгүй байхаар тохиролцжээ. Өөрөөр хэлбэл туслан гүйцэтгэгчээр монголчууд ажиллаж, цемент арматур зэргийг Японоос оруулж ирэх юм байна.

 

Барилгын материал нь түрүүчээсээ ороод ирчихсэн гэнэ. Нийтдээ 36 сарын хугацаанд барьж дуусгахаар төсөлдөө тусгасан ч өнөөдрийн бэлтгэл ажлын явцаас харахад товлосноос өмнө амжих боломж харагдаж байгаа юм. Тухайн орчмынх нь газрыг чөлөөлөх, барилгын ажлын жигд ажиллагааг хангах үүднээс цахилгаан болон усаар хангах зэрэг үүргийг манай тал хүлээж байгаа аж.