Ерөнхий сайд С.Баяр тэргүүтэй арав гаруй хүний санаaчлагаар ИД-ийн урд талбайд “Beatles”-ийн хөшөө баригдахаар боллоо.

Ерөнхий сайд С.Баяр, ая зохиогч Б.Долгион, Г.Ганхүү, УИХ-ын гишүүн Э.Бат-Үүл, НИТ-ийн тэргүүлэгч Ш.Алтангэрэл зэрэг алдарт “Beatles” хамтлагийн шүтэн бишрэгч арав гаруй хүний санаачлагаар Их дэлгүүрийн урд талбайд дээрх хамтлагийн хөшөөг барихаар болсон байна.

Хөшөөг барих болсонтой холбогдуулан энэ сарын 4-ний өдөр санаачлагчид нь сэтгүүлчдэд хэвлэлийн бага хурал хийлгэлээ.

Хөшөөг нийтдээ 100 гаран сая төгрөгөөр барихаар тооцсон бөгөөд хөрөнгө босгох үдэшлэгийг энэ сарын 26-ны өдөр “IRISH” pub-д хийхээр төлөвлөөд байгаа юм байна. Хөшөөг хананы нэг талд “Beatles” хамтлагийн дөрвөн гишүүн зогсож байгаагаар нөгөө талд нь гитар барьсан Монгол залуу сууж байгаагаар барихаар зургыг нь гаргаад байгаа бөгөөд хувь нэмрээ оруулж байгаа байгууллага компаниудын нэрийг мөнхөлж бичихээр болжээ.

“Beatles” гэсэн бичигтэй цамц өмссөн Ерөнхий сайд сэтгүүлчдэд хандан: Та бүхэн энэ мэдээлийг  цацахдаа Beatles хамтлагийн дууг тавьж, олон нийтийг энэ үйлст уриалахыг хүслээ. Харин Э.Бат-Үүл гишүүн “Beatles” хамтлагийн тухай сэтгэгдлээ ярихдаа: Бидний үеийн амсаж, амталж байсан тэр гайхамшигтай мэдрэмж дахиж хойч үед маань олдохгүй байх гэж би боддог. “Beatles”-ын дууг бид чинь нууж, хааж байж их л зовж байж сонсдог байлаа. Тэгээд ч тэр юмуу их л сайхан амттай сонсогддог байсан. Харин одоо үеийнхэн ямар нэгэн хөгжмийг нууж сонсдоггүй байх.

Хөшөөний нээлт энэ оны 9-р сард болох бөгөөд нээлтийн үеэр “Beatles” хамтлагийн гишүүн Пол Макартныг эх орондоо урих бодолтой байгаагаа санаачлагчид дурьдлаа.

 “Beatles” хамтлагийн хөшөөг босгосноор Монголын залуучууд дэлхийн соёлыг дэмжиж, хөшөөг босгосон азийн анхны орон болох юм байна. Мөн хөшөөг босгоход хувь нэмэрээ оруулахыг хүссэн байгууллага, хувь хүмүүс Капитрон банк, 3053002155 тоот дансаар харьцаж болох ажээ.