Монгол Улсын иргэнд газар өмчлүүлэх тухай хууль гараад нэлээн хэдэн жил болж байна. Түүнчлэн газрыг өрхөд биш иргэн бүрт өмчлүүлэх болсоор бас л хэдэн жилийг үджээ. Гэтэл “нийслэлд өмчлүүлэх газар бараг байхгүй, хүүхдэд газар олгохгүй байна” гэж иргэд ярих болсон. Энэ талаар Нийслэлийн газрын албаны дарга Ц.Сундуйгаас тодруулахад, “энэ жилийн хувьд бэлтгэгдсэн газрын нөөц иргэдийн тоотой харьцуулахад байгаа. Тухайлбал: 6 ам бүлтэй өрх өмнө нь газраа өмчилж авсан байлаа гэхэд иргэн бүрт газар өмчлөх болсноор нэг нь өмнөх газраа өмчилж, үлдсэн тав нь дахин газар өмчлөх эрхтэй болж байгаа. Гэтэл энэ тавд нь газар өгье гэхээр түрүүчийн газраа өмчилж  аваагүй байсан хүмүүсийн дараалал хойшлоход хүрээд байгаа юм. Тиймээс энэ жилдээ насанд хүрсэнд нь дараагийн ээлжинд хүүхдэд газар өмчлүүлэхээр төлөвлөж байгаа” гэлээ.

 

Түүнчлэн нийслэлд одоогоор Сонгинохайрхан дүүрэгт зам дагуу, Хан-Уул дүүрэгт Биокомбинат, Өлзийт хороолол, Шувуун фабрикт газар олгох бол, Баянзүрх дүүрэг тусгай хамгаалалттай газар нутаг ихтэй учир энд тун жаахан газар байгаа гэнэ. Харин олон жил яригдаж, өнгөрсөн жилээс эхлүүлнэ гэж байсан зуслангийн газрыг энэ жилээс өмчлүүлж эхлэх аж. Тусгай хамгаалалттай, хориотой гэх мэт бүсэд зарим нь байгаа учир одоо мөрдөж байгаа хуулийн хувьд зуслангийн ихэнх газрыг шууд өмчлүүлэх боломжгүй байгаа юм байна. Мөн 00, хаягжилт, орц, гарц зэрэг асуудал нь шийдэгдээгүй байгаа учраас газар өмчлүүлэхэд хүндрэлтэй байгаа ажээ. Энэ бүх асуудлыг шийдэхээр Нийслэлийн газрын алба бусад мэргэжлийн болон холбогдох байгууллагуудтай хамтран ажиллаж байгаа юм байна.

 

Харин нийслэлийн зуслангийн бүсэд 20 гаруй мянган өрхийн газар 19 аманд байгаа юм. Үүнээс одоогийн байдлаар ердөө 6000-ыг нь шууд хувьчлах боломжтой байгаа ажээ. Статистик мэдээгээр нийслэл 1,106 сая хүн амтай болоод байна.