Г. Мягмар: Орон сууцжуулах хөтөлбөр гацаанд орчихоод байна
Barilga
2019-11-05
Төрийн албан хаагчдад зориулсан 4000 орон сууцны хөнгөлөлттэй зээлийн хэрэгжилт удаашралтай байна. Өнгөрсөн оны 12 сарын эхээр Засгийн газар шийдвэрээ гаргаж, төсвийн ерөнхийлөн захирагчдад орон сууцны квотыг хуваарилсан. Үүнээс хойшхи 3 сарын хугацаанд 150 төрийн албан хаагч хөнгөлөлттэй зээлд хамрагдахаар гэрээ байгуулжээ. Энэ талаар ЗТБХБЯ-ны газрын орлогч дарга Г. Мягмараас тодруулав.
- Төрийн албан хаагчдын 4000 орон сууцны зээлийн хэрэгжилт ямар байна вэ. Одоогоор хичнээн төрийн албан хаагч орон сууцандаа ороод байгаа бол?
- Яг байраа авсан хүн байхгүй.
- Нэг ч төрийн албан хаагч орон сууцандаа ороогүй гэж үү?
- Тийм. Хүмүүс сонголтоо хийгээд санаанд нь нийцэх байр ховор байх шиг байна.
- Барилгын чанар муу байгаа хэрэг үү?
- Чанар муу биш. Хамгийн гол нь энэ зээлд хамрагдаж байгаа орон сууцнуудын байршил төрийн албан хаагчдад таалагдахгүй байна. Тэд хотын төвд, А зэрэглэлийн бүсэд, ажлын газар болон бусад үйлчилгээндээ ойрхлн байр сонгох сонирхолтой байгаа. Гэтэл бэлэн болоод байгаа барилгуудын ихэнхи нь хотын зах руу байгаа. Хотын төвд байгаа орон сууцнуудын талбайн үнэ өндөр байж таарна. Ингээд бэрхшээл үүсээд байна.
- Засгийн газрын тогтоолын дагуу ам.метр талбайгаа 650 мянган төгрөгөөр талбайгаа үнэлж байгаа барилгын компани бараг байхгүй юм биш үү?
- Талбайг нь 650 мянгаар үнэлсэн орон сууц хотын зах руугаа байгаа. Харин хлтын төвийн орон сууцны талбайн үнэ ийм байх аргагүй. Ер нь хүний бүх хүслийг хангасан нөхцөлтэй байр олдохгүй шүү дээ.
- Засгийн газрын тогтоолд заасан 40 сая төгрөгийн босгонд багтаагаад хотын захад байрлалтай хямд үнэтэй орон сууцыг захиалж, зах зээлд хамрагдах, эсвэл А зэрэглэлийн бүсэд байгаа орон сууцны талбайн үнийн зөрүүг төлөөд зээл авах болзлыг хүлээн зөвшөөрч байгаа иргэд хэр олон байна вэ?
- 150 төрийн албан хаагч сонгоод гэрээ байгуулсан. Тэдний материалыг манай яам ОССК-д өгөөд байна. Эхний ээлжинд эдгээр 150 төрийн албан хаагчийн зээлд шаардагдах 7 тэрбум орчим төгрөгийн бондыг Засгийн газар хөрөнгийн биржид арилуаалах үйл ажиллагааг зохион байгуулах байх. Энэ талаар Засгийн газар шийдвэрээ гаргасан. Одоо Сангийн яам, ОССК хамтран судалгаа явуулаад бонд гаргана.
- Орон сууцны зээлийг хэрэгжүүлэхэд өөр ямар хүндрэл гарч байна вэ?
- 4000 орон сууцны зээлийн асуудлыг Засгийн газар эцэслэн шийдэх үед хүйтний улирал эхэлсэн тул барилгын ажил зогссон. Одоо 4-р сараас барилгын ажил эхэлнэ. Үндсэн барилга угсралтын ажил нь дуусаад дотоод засал, сантехник угсралтын ажил дутуу үлдсэн нилээд барилга байгаа. Гэтэл Засгийн газрын тогтоолд улсын комисс хүлээн авсан, заавал банкны зээлийн барьцаанд байгаа орон сууцыг энэ зээлд хамруулна гэж заасан. Энэ бол арилжааны банкуудад үүссэн хүндрэлийг шийдэх зорилготой байсан. 4000 орон сууц хөтөлбөр хэрэгжээд эхэлсний дараа харж байхад дээрхи журмаа зарим талаар эргэж хармаар байна. Төрийн албан хаагчид заавал банкны зээлийн барьцаанд байгаа орон сууцыг сонгоно гэсэн нөхцөл нэлээд хатуудсан. Банкны зээлгүй, хувийн болон гадаадын хөрөнгө оруулалттай орон сууцыг ч энэ зээлд хамруулмаар байна гэсэн саналыг олон хүн хэлж байгаа. Энэ мэтээр хөтөлбөрийг хэрэгжүүлээд эхлэхээр урьдчилж хараагүй хүндрэл цөөнгүй гарч байна. Тиймээс төрийн албан хаагчдын орон сууцны зээлийн нөхцөлийг хөнгөлөх, нээлттэй болгох чиглэлээр зарим зүйлийг харж үзэх хэрэгтэй юм шиг санагдаж байгаа. Тэгэхгүй бол аль аль талдаа жижиг хүндрэлүүд үүсээд байна.
- Тэгэхээр журамдаа өөрчлөлт оруулах шаардлагатай гэсэн үг үү. Ер цаашид төрийн албан хаагчдад зориулсан энэ зээлийн хэрэгжилтийг хэрэгжүүлэхийн тулд Засгийн газар ямар алхам хийх шаардлагатай вэ?
- Журамд өөрчлөлт оруулахын тулд нэлээд судалгаа хийх хэрэгтэй. Шалгуур нөхцөлөө эргэн харах ёстой болов уу. Ашиглалтанд орсон, банкны зээлгүй орон сууц хэд байна, тэдгээр орон сууцууд Засгийн газрын тогтоолд дурдсан зорилго чиглэлд сөргөөр нөлөөлөхгүй бол судалж үзэж, төрийн албан хаагчдын зээлд хамруулах асуудлыг тавих хэрэгтэй байх. Энэ зээлд хамрагдах 4000 орон сууцыг бүгдийг нь хотын төвд байна гэж шийдээгүй. Тэгэхээр хотын төвд баригдсан орон сууцыг сонгохгүй гэж байгаа төрийн албан хаагчдын шаардлагыг үгүйсгэхгүй боловч тэд сонголтоо хийхдээ Засгийн газраас гаргасан шийдвэртэй уялдуулахаас өөр аргагүй. 4000 орон сууцны зээлийн журмыг өөрчлөхөд хүрвэл хаана хэдэн айлын орон сууцны барилга ямар шатандаа байгааг сайн судлах хэрэгтэй. Ер нь нэг талд төрийн албан хаагчид энэ хөтөлбөрийн хүрээнд орон сууцны үнэ буурах ёстой гэсэн хүлээлттэй, нөгөө талд барилгын компаниуд үнэтэй материалаар барилгаа барьсан учир үнийг нь буулгахгүй гэсэн байр суурьтай байгаагаа гацаа үүсээд байна.
- 4000 орон сууцны зээлд зориулж нийт үнэ нь 40 сая төгрөгөөс илүүгүй боловч талбайн нь 650 мянган төгрөгөөс дээш үнэтэй орон сууц цөөнгүй баригдсан талаар иргэд шүүмжилж байна. Энэ талаар танай яам хяналт тавьж байгаа юу?
- Энэ зээлийн нөхцөл, болзол 10 сарын сүүлээр бэлэн болсон. Тэр үед барьсан барилгыг тэгж өөрчлөхөд их зардал гарна. Нийт талбайн үнэ нь 40 сая төгрөгт багтахаар байр барьсан компаниуд л энэ зээлд хамрагдсан. Түүнээс биш барилгын компаниуд дутуу барьсан барилгадаа өөрчлөлт хийгээд өрөө, талбайг нь багасгана гэж байхгүй. Энэ бол худлаа.
Үндэсний шуудан