Хаана ямар орон сууц шинээр барьж байгаа болон үнэ ханшийн мэдээллийг иргэдэд өгөхөөр " Шинэ орон сууц - 2007 " үзэсгэлэн яармаг Мэдээлэл технологийн үндэсний паркад өчигдөр нээгдлээ. Тус үзэсгэлэнд шинээр орон сууц барьж буй "Нийслэл өргөө", "Гангар инвест", "Хаус интернешнл", "UB town", "Хасуу констракшн", "Зарубежстрой", "Номноо", "Нисора"  зэрэг барилгын компаниуд оролцож байна. "40000 орон сууц" хөтөлбөрийн хүрээнд 154 айлын орон сууцны "А" блокийг "Батс өргөө" компани гүйцэтгэж байгаа ба нэг өрөө байр нь 32.9-42.1 ам метр талбайтай бөгөөд нэг ам метр талбай нь 455 ам.долларын үнэтэй байна. Үзэсгэлэнд барилгын компаниудаас гадна "Худалдаа хөгжлийн банк", "Голомт", "Капитал" банк зээлийн болзол танилцуулж байсан. Тухайлбал, та орон сууц худалдан авах буюу барих гэж байгаа бол нийт үнийн 25-30 хувийг урьдчилан төлөөд 1-10 жилийн хугацаагаар 3-150 сая төгрөгийн зээлийг ХХБанкнаас авч болох гэнэ. Зээлийн хүү нь жилд 16.90, сард 1.4083 хувь юм байна. Харин Голомт банк 10 хүртэл жилээр 70 сая хүртэл хэмжээний мөнгийг сарын 1.65 хувийн хүүтэйгээр орон сууцны зээл олгодог байна.Та илүү дэлгэрэнгүй мэдээлэл авахыг хүсвэл өнөөдөр маргааш үргэлжлэх үзэсгэлэнг зориорой.