Улаанбаатар хотын хөгжлийн тулгамдсан асуудлыг шийдвэрлэх ялангуяа бага дунд орлоготой иргэдийн орон сууцны хангамжийг нэмэгдүүлэх, орон сууцны үнийн зохистой тогтолцоог бүрдүүлэх чиглэлээр Улаанбаатар хот, Барилгын ассоциацитай хамтран ажиллахаар боллоо. Монгол Улсын Засгийн газар, Улаанбаатар хотын Захирагчийн 2009-2012 оны үйл ажиллагааны хөтөлбөрийг хэрэгжүүлэх ажлын хүрээнд төр, хувийн хэвшлийн түншлэлийг хөгжүүлэхэд чухал алхам болох энэхүү санамж бичигт Нийслэлийн Засаг дарга бөгөөд Улаанбаатар хотын Захирагч Г.Мөнхбаяр, Монголын Барилгын Ассоциацийн Ерөнхийлөгч О.Чулуунбат нар өнөөдөр гарын үсэг зурсан байна.

 

Талууд юуны өмнө нийслэлийн ерөнхий төлөвлөгөөг хэрэгжүүлэх хууль эрх зүйн орчинг боловсронгуй болгох талаар хэд хэдэн хуулийг шинээр боловсруулж батлуулах, байгаль экологийн тэнцвэртэй байдлыг хангах, барилгын материалын чанар аюулгүй байдлыг хангах талаар холбогдох хуулиудад нэмэлт, өөрчлөлт оруулахаар төлөвлөсний зэрэгцээ барилга барих зөвшөөрөл олгохоос барилга угсралтын ажил эхлэх хүртэлх үйл ажиллагааг нэг цэгийн үйлчилгээнд оруулах арга хэмжээг ЗТБХБЯ, ЭБЭХЯ-тай хамтран хэрэгжүүлж, төрийн үйлчилгээний шуурхай байдлыг хангах ажээ.

 

Мөн Улаанбаатар хотын утааг багасгах, хөрс усны бохирдлыг нормативт хэмжээнээс хэтрүүлэхгүй байх, гэр бүхий айл өрхийг орон сууцжуулах зорилтыг тууштай хэрэгжүүлж, бага дунд орлоготой иргэдийн орон сууцны хангамжийг нэмэгдүүлэх ажлын хүрээнд Улаанбаатар хотын гэр хорооллын газрыг шинэчлэн барилгажуулах, шинээр хотхон хороолол байгуулах төслийг хэрэгжүүлэхэд Барилгын ассоциацийн гишүүн байгууллагуудын үйл ажиллагааг чиглүүлж, орон сууцны талбайн үнийг хямдруулах, бодит нөхцөл байдалд нийцүүлэх арга хэмжээ авах юм. Түүнчлэн дэд бүтэц бүхий газарт шинээр барих орон сууцны барилгын 50 хувь нь бага дунд орлоготой иргэдийн худалдан авах чадавхид нийцсэн хямд өртөг бүхий орон сууц байхаар төлөвлөж, иргэд өөрийн өмчлөлийн газраа орон сууцаар солих нөхцлийг бүрдүүлж, эхний ээлжинд “Налайх, Багахангай дүүрэгт “Барилгын материалын үйлдвэрлэлийн парк” байгуулах асуудлыг хамтран шийдвэрлэхээр боллоо.

Улаанбаатар