УИХ дахь Төрийн байгуулалтын байнгын хорооны өнгөрсөн оны арваннэгдүгээр сарын 27-ны өдрийн хуралдаанаар “Төрийн ордон” цогцолборыг Төрийн тусгай албан хаагчдын нэгдсэн эмнэлгийг нүүлгэж суурин дээр нь барихаар болсон  шийдвэрээсээ гишүүд буцжээ. Эрхэм гишүүд тансаг ордноо Төрийн ордны хойно байрлах цэцэрлэгт хүрээлэнгийн газарт барихаар болсон байна. Тэд шийдвэрээ өөрчлөх болсон шалтгаанаа төвөг, зардал багатайгаар гэж томъёолсон байх юм. УИХ-ын хэсэг гишүүд дээрх үндэслэлийг оновчтой бус шийдэл хэмээн эсэргүүцэж байсан юм. Кувейтын хөрөнгөөр тансаг сайхан орд барьж  тухлан суух түшээдэд цэцэрлэгт хүрээлэн байсан, байгаагүй ялгаагүй бололтой.

Шийдвэрээ эргэж харах нь бүү хэл нүдэн балай чихэн дүлий байсаар өнөөдрийг хүрлээ. Өнгөрсөн долоо хоногт Засгийн газрын хуралдаанаар хэлэлцүүлж парламентын ордон сүндэрлүүлэх газраа тогтож орхисон. Төрийн ордны хойно байрлах ард түмний цэцэрлэгт хүрээлэнг авч үлдэхийн төлөө санал нэгдсэн зарим гишүүд  24-д хүрсэн ч шийдвэр гаргах төвшинд нөлөөлж чадсангүй. Тиймээс Төрийн ордны цогцолбор барих тухай шийдвэрийг  дахин  хэлэлцэж Улаанбаатар хотын хүн амын төвлөрөл, агаарын бохирдол, дуу чимээ, тоосжилттой харьцуулахад хэт цөөдөж буй цэцэрлэгт хүрээлэнгийн нэгийг хадгалж үлдэх шийдвэр гаргана гэдэгт найдаж буйгаа илэрхийлж 24-үүлээ гарын үсгээ зурсан албан бичгийг Төрийн байгуулалтын байнгын хорооны дарга Ө.Энхтүвшинд өргөн барьжээ. Анх Кувейтууд парламентын ордон барихад 15 сая ам.долларын тусламж үзүүлэхээ амласан бол ордноо сүндэрлүүлэх газраа ололгүй мунгинасан хоёр жилийн хугацаанд 30 сая ам.доллар болгож өсгөсөн байна.

“Аманд орсон шар тосыг хэлээрээ түлхэх хэрэггүй”  ч эзлэн түрэмгийлж, байгаа бүхнээ устгах хэрэг байсан уу? Өнөөдрийг хүртэл Төрийн ордондоо багтаж шингээд болсон байж нэмж  парламентын ордон барих шаардлага байна уу. Олон тэрбумын зээл тусламжийг ёроолгүй сав шиг гулгуулж болсон юм чинь энэ удаад эмнэлэг, сургууль барьж  яагаад болохгүй гэж. Ганцаар тоологдоход хүрсэн цэцэрлэгт хүрээнг аврахаар сэтгэл нийлсэн УИХ-ын гишүүд хаврын чуулган эхлэхтэй зэрэгцэн тэмцлээ эрчимжүүлэх гэнэ.

Тэдний саналыг дэмжиж Монголын худалдаа аж үйлдвэрийн танхим, Монголын Үйлдвэрчний эвлэлүүдийн холбоо мэдэгдэл гаргах болжээ. Төрийн болон төрийн бус байгууллагууд ногоон байгууламжаа аврах тэмцэлд нэгдэхэд бэлэн байна. УИХ, Засгийн газар гаргасан шийдвэрээ өөрчлөлгүй зүтгээд байвал С.Оюун, Г.Баярсайхан, Д.Энхбат, Д.Загжав, Д.Оюунхорол нарын 24 гишүүн гудамжинд гарч ард түмнээс  гарын үсэг цуглуулахаар бэлтгэж байна.

УИХ-ын гишүүн Л.Гантөмөр: Ордон барих газар хаанаас ч олдоно

-Кувейтууд парламентын ордон  барихад зориулж өгсөн болохоор манайхан заавал нэг ордон барихаар зүтгээд байгаа юм. Үнэхээр ордон барих гэж байгаа бол Төрийн ордны баруун, зүүн талд газар байна.  Заавал цэцэрлэгт хүрээлэн буулгах шаардлага байхгүй. Ордны баруун талын машины зогсоол дээр, доороо гаражтай  барьж болно. Улаанбаатарт ногоон байгууламж ус, агаар мэт хэрэгтэй байгааг ойлгомоор юм. Өмнөх шийдвэр нь Төрийн тусгай албан хаагчдын эмнэлгийг буулгахаар гарч байсан. Энэ хувилбараа сонгож болно.

УИХ-ын гишүүн С.Оюун: Ард түмнийхээ үгийг сонсох хэрэгтэй

-УИХ, Засгийн газар ордон барих асуудлыг шийдэж болно. Гэхдээ ард түмнийхээ үгийг сонсох хэрэгтэй. Нийслэлд ганц, хоёрхон үлдсэн цэцэрлэгт хүрээлэн рүү хүйтэн сэтгэлээр хандах хэрэггүй. Бидний санал дэмжигдэхгүй бол нийслэлчүүддээ хандан  гарын үсэг зурах ажлыг эхлүүлнэ. Парламентын  танхим багадаад байгаа биш. Мөнгийг нь төсөв хүрэлцэхгүй, хөрөнгө оруулалт дутагдаад байгаа хэрэгтэй зүйлд зарцуулж болно шүү дээ.

УИХ-ын гишүүн О.Чулуунбат: Цэцэрлэгт хүрээлэнг буулгахыг дэмжихгүй

-Төрийн ордны хойно байрлах цэцэрлэгт хүрээлэнг буулгахыг дэмжихгүй. Боломжийн хувилбар нь Төрийн тусгай албан хаагчдын эмнэлгийг буулгах байсан юм. Тэнд Төрийн ордны цогцолбор байгуулчихаад одоогийн ордонтойгоо газар доогуур холбочихвол их зүгээр байна. Шинэ ордонд бүх яамыг оруулах хэрэгтэй. Тэгвэл асуудал шийдэхэд, иргэдэд ч амар болно. Дэлхийн бусад улс оронд яамд нь нэг дор байрласан нь  цаг хугацаа хожих,  шийдвэрт хүрэхэд хялбар байдаг юм билээ.

УИХ-ын гишүүн Д.Оюунхорол: Парламентын ордон хаана байх нь чухал биш

-Нийслэлд тоотой хэдхэн үлдсэн ногоон байгууламжаа битгий устгаасай. Парламентын ордноо хаана барих нь чухал биш. Газрын алба  судалж байгаад оновчтой хувилбар санал болгох байлгүй.

Судалгаатай, байгальд хоргүй, ард түмэндээ ээлтэй шийдэлд хүрэх хэрэгтэй. Нэг ордон барихын төлөө олон жилийн түүхтэй цэцэрлэгт хүрээлэнгээ буулгах шаардлагагүй. Дахин ийм хүрээлэн байгуулах хөрөнгө, цаг хугацаа их орно.

Ц.Ургамал