Ашиглалтад ороод хоёрхон жилийн нүүр үзэж байсан Өвөрхангай аймгийн Уянга сумын холбооны газрын байрны нэг талын тоосгон хана салхинд нурж унажээ.

Уг байшин 11 сая төгрөгийн өртөгтэй, 7х7 метрийн урт, өргөнтэй авсаархан байгууламж юм. Ханыг нь нэг хэвд оруулан шоолсон дүнзээр босгож, гадуур нь тоосгоор өнгөлсөн байжээ. Гадаргын нам талын хананд өрсөн тоосгон хийц жилийн өмнө гадагш цүлхийснийг өнгөрсөн өдрүүдийн шуурга нэрмэж унагасан нь энэ. Барилга шөнийн цагаар нурсан тул хүн амьтан өртөөгүй аж. Сумын зуун хүүхдийн цэцэрлэг энэ байшингаас хэдхэн алхмын зайд үйл ажиллагаа явуулдаг юм байна.

"Тоосгонуудыг хооронд нь авцалдуулдаг зуурмаг бараг цементийн орцгүй бутарч унаж байна билээ" гэж сумын холбооны эрхлэгч ярилаа. Холбооны газрынхан тендерт шалгаран уг байшинг барьсан "Хархорин" компанид нь хандаад байгаа аж.

МОНЦАМЭ